കണ്ണടച്ച് ഇരുട്ടാക്കി മന്ത്രി സജി ചെറിയാൻ: ഹേമ കമ്മിറ്റി റിപ്പോർട്ട് പുറത്ത് വിടേണ്ടത് വിവരവകാശ കമ്മീഷനെന്ന് മന്ത്രി

ജസ്റ്റിസ് ഹേമ കമ്മിറ്റി റിപ്പോർട്ട് ഇന്ന് പുറത്തുമോ എന്ന കാര്യത്തിൽ തീരുമാനമായില്ല. റിപ്പോർട്ടുമായി സംബന്ധിക്കുന്ന എല്ലാ ഉത്തരവാദിത്തങ്ങളും വിവരാവകാശ കമ്മീഷൻനാണെന്നും സർക്കാർ റിപ്പോർട്ട് പുറത്തുവിടുന്നതിന് എതിരല്ലെന്നും മന്ത്രി സജി ചെറിയാൻ. സാംസ്കാരിക വകുപ്പിൻ്റെ കീഴഇൽ വരുന്ന വിഷമല്ല ഹേമ കമ്മിറ്റി റിപ്പോർട്ട്. ഈ വിഷയത്തിലെ വകുപ്പിൻ്റെ ചുമതലകൾ വളരെ കൃത്യമായി നിർവ്വഹിച്ചിട്ടുണ്ടെന്നും മന്ത്രി മാധ്യമങ്ങളോട് വ്യക്തമാക്കി.

ഹൈക്കോടതി നിർദ്ദേശപ്രകാരം ഒരാഴ്ച്ചയ്ക്കകം പുറത്തുവിടണമെന്നാണ് അറിയിച്ചിരുന്നത്. സർക്കാരിനോ വകുപ്പിനോ ഈ വിഷയത്തിൽ ഒരു പങ്കും ഇല്ല. റിപ്പോർട്ട് പുറത്തുവിടേണ്ടതും അതിൽ തീരുമാനങ്ങൾ എടുക്കേണ്ടതും സംസ്ഥാനത്തെ വിവരാവകാശ കമ്മീഷനാണ്. റിപ്പോർട്ട് പരസ്യപ്പെടുത്താൻ നിയമതടസ്സങ്ങളില്ലെന്നും മന്ത്രി വ്യക്തമാക്കി.

റിപ്പോർട്ടിലെ കോടതി നിർദ്ദേശങ്ങൾ പൂർത്തിയാക്കി റിപ്പോർട്ട് വിവരാവകാശ കമ്മീഷന് സാംസ്കാരിക വകുപ്പ് കൈമാറിയിരുന്നു. അതുകൊണ്ടുതന്നെ നിലവിൽ റിപ്പോർട്ട് പുറത്തുവിടുന്നതുമായി ബന്ധപ്പെട്ട എല്ലാ നടപടി ക്രമങ്ങളും പൂർത്തിയാക്കേണ്ട ഉത്തരവാദിത്തം സർക്കാരിനോ സാംസ്കാരിക വകുപ്പിനോ ഇല്ലെന്ന് മന്ത്രി സജി ചെറിയാൻ വ്യക്തമാക്കി.

ഇന്ന് രാവിലെ 11 മണിക്ക് ഹേമ കമ്മിറ്റി റിപ്പോർട്ട് കൈമാറുമെന്നാണ് ഇന്നലെ അറിയിച്ചിരുന്നത്. അതിനിടെയാണ് റിപ്പോർട്ട് പുറത്തുവിടുന്നതിന് മുമ്പ് മൊഴി കൊടുത്തവർക്ക് പകർപ്പ് നൽകണമെന്ന് ആവശ്യപ്പെട്ട് നടി രഞ്ജിനി ഹൈക്കോടതിയെ സമീപിച്ചത്. തിങ്കളാഴ്ച കേസ് ഹൈക്കോടതി പരിഗണിക്കും. കോടതിയെ സമീപിച്ചതായി നടി രഞ്ജിനി സർക്കാരിനെ അറിയിച്ചിട്ടുണ്ട്.

നിർമാതാവ് സജിമോൻ പാറയിലിൻറെ ഹർജി തള്ളിയ കോടതി ഉത്തരവ് അനുസരിച്ച് റിപ്പോർട്ട് പുറത്തുവിടാൻ 19-ാം തീയതി വരെ സർക്കാരിന് സമയമുണ്ട്. അതിനാൽ അൽപം കൂടി കാത്തിരിക്കാമല്ലോ എന്നാണ് സർക്കാർ വൃത്തങ്ങൾ അറിയിച്ചത്. സ്വകാര്യതയെ ബാധിക്കുന്നതും ആളുകളെ തിരിച്ചറിയുന്നതുമായ വിവരങ്ങൾ ഒഴിവാക്കി 233 പേജുകളുള്ള റിപ്പോർട്ട് കൈമാറാനാണ് നീക്കം. 49 ആം പേജിലെ 96 ആം പാരഗ്രാഫും 81 മുതൽ 100 വരെയുള്ള പേജുകളിലെ 165 മുതൽ 196 വരെയുള്ള ഭാഗങ്ങളും ഇതനുസരിച്ച് ഒഴിവാക്കും. അനുബന്ധവും പുറത്തുവിടില്ല.

2017 ഫെബ്രുവരി 17ന് നടി ആക്രമിക്കപ്പെട്ടതാണ് ഹേമ കമ്മിറ്റി രൂപീകരണത്തിലേക്ക് എത്തിച്ചത്. അതേ വർഷം ജൂലൈ ഒന്നിന് ഹേമ കമ്മിറ്റി നിലവിൽ വന്നു. സിനിമാ മേഖലയിലെ സ്ത്രീകൾ അനുഭവിക്കുന്ന പ്രശ്‌നങ്ങൾ പഠിച്ച് ആറുമാസത്തിനുള്ളിൽ റിപ്പോർട്ട് സമർപ്പിക്കണം എന്നായിരുന്നു ആവശ്യം. രണ്ടുവർഷത്തിനുശേഷം 2019 ഡിസംബർ 31നാണ് കമ്മറ്റി മുഖ്യമന്ത്രിക്ക് റിപ്പോർട്ട് കൈമാറിയത്.

റിപ്പോർട്ട് പുറത്തുവരാതായതോടെ പിന്നീട് പുറത്തുവിടണമെന്ന ആവശ്യം ശക്തമായി. കോടതിയിൽ ഈ വിഷയം എത്തിയതോടെ റിപ്പോർട്ട് പഠിക്കാനുള്ള സാവകാശം വേണമെന്ന് സർക്കാർ വാദിച്ചു. സ്വകാര്യതയെ ഹനിക്കുന്ന വിവരങ്ങൾ ഉള്ളതിനാൽ റിപ്പോർട്ട് പുറത്തുവിടാൻ ആകില്ലെന്ന് സർക്കാർ നിലപാടിൽ ഉറച്ചുനിന്നു. ഒടുവിൽ വിവരാവകാശ കമ്മീഷണർ എ. അബ്ദുൽ ഹക്കീം റിപ്പോർട്ട് പുറത്തുവിടാൻ ഉത്തരവിട്ടു. വിലക്കപ്പെട്ട വിവരങ്ങൾ ഉള്ളതിനാൽ ഒരു റിപ്പോർട്ട് പൂർണമായും രഹസ്യമായി വെക്കരുതെന്ന് മുൻവിധിന്യായങ്ങൾ ചൂണ്ടിക്കാട്ടിയായിരുന്നു ഉത്തരവ്.