ബെംഗളൂരു: നേഹ ബിസ്‌വാൽ എന്ന സോഷ്യൽ മീഡിയ ഇൻഫ്ലുവൻസർക്ക് ബെംഗളൂരുവിൽ വെച്ചുണ്ടായ അനുഭവം നഗരത്തിലെ താമസക്കാരെ ഞെട്ടിച്ചിരിക്കുകയാണ്. തനിക്കു നേരെ നടന്ന ഒരു ലൈംഗികാക്രമണത്തെ കുറിച്ച് നേഹ സോഷ്യൽ മീഡിയയിലെത്തി വിവരിക്കുകയായിരുന്നു. സാധാരണ ലൈംഗികാക്രമണങ്ങളിൽ നിന്ന് വ്യത്യസ്തമായിരുന്നു നേഹയ്ക്കുണ്ടായ അനുഭവം. ഒരു പത്തുവയസ്സുകാരൻ പയ്യനായിരുന്നു ഈ സംഭവത്തിൽ ആക്രമണകാരി!
സോഷ്യൽ മീഡിയയിൽ കണ്ണീരോടെയാണ് നേഹ ബിസ്‌വാൽ തനിക്കുണ്ടായ ദുരനുഭവം വിവരിച്ചത്. ബിടിഎം ലേഔട്ടിൽ വെച്ചായിരുന്നു ആക്രമണം. ബിടിഎം ലേഔട്ടിലെ ഒരു റോഡരികിലൂടെ നടക്കുകയായിരുന്നു നേഹ. ദിവസവും ചെയ്യാറുള്ള വ്ലോഗിങ്ങിനു വേണ്ടി ക്യാമറയും ഓൺ ചെയ്ത് പിടിച്ചിരുന്നു. സംസാരിച്ച് നടന്നു വരുന്നതിനിടയിൽ പെട്ടെന്ന് എതിർവശത്തു നിന്ന് ഒരു ചെറിയ പയ്യൻ സൈക്കിളിൽ എത്തി. അവൻ കൈയും കലാശവും കാട്ടുന്നുണ്ടായിരുന്നു. ആദ്യം ‘Hi’ എന്ന് പറഞ്ഞ് അവൻ നേഹയെ സമീപിച്ചു. പെട്ടെന്ന് അവൻ നേഹയുടെ അടുത്തെത്തുകയും നെഞ്ചിൽ കയറിപ്പിടിക്കുകയുമായിരുന്നു.
സംഭവത്തിൽ ബെംഗളൂരു പോലീസ് സ്വമേധയാ കേസെടുത്തിട്ടുണ്ട്. ചില മാധ്യമ റിപ്പോർട്ടുകൾ പ്രകാരം സംഭവത്തിൽ ഒരു കുട്ടിയെ പോലീസ് പിടികൂടിയിട്ടുമുണ്ട്.
ബെംഗളൂരുവിൽ കഴിഞ്ഞ 11 വർഷത്തിനിടയിൽ റിപ്പോർട്ട് ചെയ്യപ്പെട്ടത് 1322 ബലാൽസംഗക്കേസുകളാണ്. ഇവയിൽ വെറും 10 കേസുകളിൽ മാത്രമാണ് കുറ്റവാളികൾക്ക് ശിക്ഷ ലഭിച്ചത്. ഞെട്ടിപ്പിക്കുന്ന ഈ കണക്കുകൾ ഡെക്കാൻ ഹെറാൾഡ് ആണ് പുറത്തു കൊണ്ടുവന്നത്. പോലീസും കോടതികളും അങ്ങേയറ്റത്തെ അലംഭാവമാണ് പീഡനക്കേസുകൾ കൈകാര്യം ചെയ്യുന്നതിൽ കാണിക്കുന്നത് എന്നതിന് മികച്ച ഒരുദാഹരണമാണിത്. 110 കേസുകളിൽ ഇതിനകം പോലീസ് തെളിവില്ലെന്ന് കോടതികളെ അറിയിച്ചിട്ടുണ്ട്. 259 കേസുകളിൽ കുറ്റാരോപിതരെ കോടതികൾ വെറുതെ വിട്ടു. 18 ശതമാനം കേസുകൾ ഇപ്പോഴും അന്വേഷണത്തിലാണ്. അന്വേഷണം ഇഴഞ്ഞാണ് നീങ്ങുന്നത്. പല കേസുകളും അഞ്ചും ആറും വർഷമായി അന്വേഷണത്തിലാണ്.
ഓരോ വർഷത്തെയും കേസുകളുടെ കണക്കെടുത്താൽ ബെംഗളൂരുവിൽ ബലാൽസംഗക്കേസുകൾ കൂടുന്നതായി കാണാൻ കഴിയും.
കേസുകൾ തോൽക്കുന്നതിന് കാരണമായി പോലീസ് പറയുന്നത് പരാതിക്കാരികൾ പിൻവാങ്ങുന്നതാണ്. ഇങ്ങനെ പിൻവാങ്ങാൻ കാരണം അഞ്ചും ആറും വർഷം നീളുന്ന അന്വേഷണവും വിചാരണയുമാണെന്ന് വിദഗ്ധർ ചൂണ്ടിക്കാട്ടുന്നു. ഇത്തരത്തിൽ വർഷങ്ങളോളം സമൂഹത്തിനു മുമ്പിൽ നാണക്കേടോടെ ജീവിക്കേണ്ടി വരികയാണ് ഇരകൾക്ക്. മാത്രവുമല്ല, നിരന്തരമായി തനിക്കുണ്ടായ അനുഭവം വിവരിച്ചു കൊണ്ടിരിക്കാൻ ഇരകൾക്ക് മാനസികപ്രശ്നങ്ങളുണ്ടാക്കുന്നു. ഇങ്ങനെ ദുരനുഭവങ്ങളിലൂടെ കടന്നുപോകുന്ന ഇരകൾ ഒടുവിൽ കേസിൽ നിന്ന് പിൻവാങ്ങുന്നതാണ് പതിവ്.
Discussion about this post