നിലമ്പൂർ: ഉപതിരഞ്ഞെടുപ്പ് സ്ഥാനാർഥി പ്രഖ്യാപനത്തിൽ നിന്നും പിവി അൻവർ പിൻവലിയുന്നു. മുസ്ലിം സാമുദായിക നേതാക്കളും, മറ്റ് പ്രമുഖ യുഡിഎഫ് – മുസ്ലിം ലീഗ് നേതാക്കളും ഇടപെട്ടതോടെയാണ് അൻവർ തന്റെ മുൻ തീരുമാനത്തിൽ നിന്നും പുറകോട്ട് പോവുന്നത്.
ഒരു പകല്‍കൂടി കാത്തിരിക്കുമെന്നാണ് അൻവർ ഏറ്റവും ഒടുവിലായി പറയുന്നത്. യുഡിഎഫ് നേതാക്കളും മറ്റു സാമുദായിക നേതാക്കളും അടക്കം ആവശ്യപ്പെട്ടതിനാലാണ് തന്റെ തീരുമാനമെന്നും അദ്ദേഹം അറിയിച്ചു. ഇന്ന് രാവിലെ സ്ഥാനാര്‍ഥിത്വവുമായി ബന്ധപ്പെട്ട് പ്രഖ്യാപനം നടത്താന്‍ അന്‍വര്‍ വാര്‍ത്താസമ്മേളനം വിളിച്ചിരുന്നു. എന്നാൽ ആ പ്രഖ്യാപനം ഇന്ന് നടത്തുന്നില്ലെന്ന് അൻവർ വ്യക്തമാക്കി
‘‘യുഡിഎഫ് നേതാക്കളും ചില സാമുദായിക നേതാക്കളും ഒരു പകല്‍കൂടി കാത്തിരിക്കണമെന്ന് ആവശ്യപ്പെട്ടിട്ടുണ്ട്. പി.കെ.കുഞ്ഞാലിക്കുട്ടി അടക്കമുള്ള നേതാക്കളടക്കം കാത്തിരിക്കാന്‍ ആവശ്യപ്പെട്ടിട്ടുണ്ട്. ഇവരൊക്കെ പറയുമ്പോള്‍ ആ വാക്ക് മുഖവിലയ്‌ക്കെടുക്കാതിരിക്കാന്‍ കഴിയില്ല’’ – അൻവർ വ്യക്തമാക്കി.
യുഡിഎഫില്‍ ഘടകകക്ഷിയാക്കാതെ ഇനി ചര്‍ച്ചയില്ലെന്നായിരുന്നു അൻവറിന്റെ മുൻ നിലപാട്. ഇന്ന് യുഡിഎഫ് യോഗം ചേരുന്ന സാഹചര്യത്തില്‍ കൂടിയാണ് അന്‍വര്‍ ഒരു ദിവസം കൂടി കാത്തിരിക്കാന്‍ തീരുമാനിച്ചത്.
Discussion about this post