തിരുവനന്തപുരം : ഗണപതി മിത്താണെന്ന പരാമര്‍ശത്തിൽ വിശ്വാസികളോട് മാപ്പ് പറയണമെന്ന ആവശ്യം ഉയരുന്നതോടെ വിശദീകരണവുമായി സ്പീക്കര്‍ എ.എന്‍. ഷംസീര്‍ രംഗത്ത്. സിപിഎം മതവിശ്വാസത്തിന് എതിരല്ലെന്നും എല്ലാ മതങ്ങളെയും മതവിശ്വാസങ്ങളെയും ബഹുമാനിക്കുന്ന വ്യക്തിയാണ് താനെന്നും ഷംസീർ പ്രതികരിച്ചു. താന്‍ ആരുടേയും മതവിശ്വാസം വ്രണപ്പെടുത്തിയിട്ടില്ലെന്നും ശാസ്ത്രത്തെ കുറിച്ച് പറഞ്ഞാല്‍ എങ്ങനെ വിശ്വാസികള്‍ക്ക് എതിരാകുമെന്നും ഷംസീര്‍ പ്രതികരിച്ചു.
വിവാദം നിർഭാഗ്യകരമാണ് . അനാവശ്യ പ്രചരണത്തിൽ നിന്ന് എൻഎസ്എസ് പിന്മാറണമെന്നും. എൻഎസ്എസ് വലിയൊരു സമുദായ സംഘടനയാണ്. അതിൽ തനിക്ക് വ്യത്യസ്ത അഭിപ്രായമില്ലെന്നും സ്പീക്കർ വ്യക്തമാക്കി. മതവിശ്വാസത്തിന് അവകാശം നല്‍കുന്ന അതേഭരണഘടനയില്‍ ശാസ്ത്രബോധത്തെ പ്രോത്സാഹിപ്പിക്കണമെന്നും പറയുന്നുണ്ട്. ഇക്കാര്യം മാത്രമാണ് താന്‍ ചെയ്തത്. ഒരു മതവിശ്വാസത്തെയും വ്രണപ്പെടുത്താൻ ഉദ്ദേശിച്ചില്ല എന്നാണ് സ്പീക്കർ പറഞ്ഞത്. മതവിശ്വാസികൾ തനിക്കൊപ്പമാണെന്നും സ്പീക്കർ അറിയിച്ചു. ഗണപതിക്കെതിരായ പരാമര്‍ശത്തില്‍ മാപ്പു പറയില്ലെന്ന് വ്യക്തമാക്കിയാണ് ഷംസീര്‍ വാര്‍ത്തസമ്മേളനം അവസാനിപ്പിച്ചത്.
Discussion about this post