എല്ലാ നവജാത ശിശുക്കള്ക്കും മുലപ്പാല് ലഭിക്കുന്നുണ്ടെന്ന് ഉറപ്പാക്കാന് ലക്ഷ്യമിട്ട് ഉത്തര്പ്രദേശിലെ ആഗ്രയില് ആദ്യത്തെ ‘മദര് മില്ക്ക് ബാങ്ക്’ തുറന്നു. മദര് മില്ക്ക് ബാങ്കിലൂടെ ശേഖരിക്കുന്ന പാല് അവ നല്കാന് കഴിയാത്ത നിര്ധനരായ അമ്മമാര്ക്ക് വിതരണം ചെയ്യുന്നു. ഇത് അവരുടെ കുട്ടികളെ ആരോഗ്യത്തോടെ വളരാനും അണുബാധയില് നിന്ന് സംരക്ഷിക്കാനും സഹായിക്കും.
മുലയൂട്ടുന്ന അമ്മമാരോട് തങ്ങളുടെ കുഞ്ഞുങ്ങള്ക്ക് മുലയൂട്ടുന്നതിനൊപ്പം മദര് മില്ക്ക് ബാങ്കിലേക്ക് സംഭാവന ചെയ്യാനും അഭ്യര്ത്ഥിക്കുന്നതായി ആഗ്രയിലെ മുതിര്ന്ന ആരോഗ്യ ഉദ്യോഗസ്ഥര് പറഞ്ഞു. അമ്മയുടെ പാല് ലഭിക്കാത്ത കുട്ടികള്ക്ക് മദര് മില്ക്ക് ബാങ്കിലൂടെ നല്കുന്ന പാല് ജീവന് നല്കുമെന്നും അധികൃതര് പറഞ്ഞു.
മുലയൂട്ടുന്ന ഏതൊരു അമ്മയ്ക്കും തന്റെ കുഞ്ഞിന് ആവശ്യമായ പാല് നല്കിയ ശേഷം ബാക്കി വരുന്ന മുലപ്പാല് മദര് മില്ക്ക് ബാങ്കിലേക്ക് സംഭാവന ചെയ്യാവുന്നതാണ്. ദാതാക്കള്ക്ക് ഒരു സ്റ്റെയിന്ലെസ് സ്റ്റീല് പാത്രത്തില് പാല് നിറച്ച് റഫ്രിജറേറ്ററില് സൂക്ഷിക്കാം. അതിനുശേഷം, ഡ്രൈ ഐസ് അടങ്ങിയ ഒരു തണുത്ത ബാഗില് പാല് ബാങ്കിലേക്ക് കൊണ്ടുവരാന് കഴിയും. ദാതാവായ അമ്മയ്ക്ക് ഏതെങ്കിലും തരത്തിലുള്ള അസുഖമുണ്ടോയെന്ന് അറിയാന് പാല് ബാങ്കില് പരിശോധിക്കും. പരിശോധനയ്ക്ക് ശേഷം പാല് വിതരണത്തിനായി സജ്ജമാക്കുന്നു.
കുട്ടികളുടെ പ്രതിരോധശേഷിയും ആരോഗ്യകരമായ വളര്ച്ചയും ഉറപ്പാക്കുന്നതിലെ സുപ്രധാന നേട്ടമാണ് മദര് മില്ക്ക് ബാങ്ക് തുറക്കുന്നതെന്ന് ചീഫ് മെഡിക്കല് ഓഫീസര് ഡോ. അരുണ് ശ്രീവാസ്തവ പറഞ്ഞു. മൈനസ് 20 ഡിഗ്രിയില് ഫ്രീസറില് സൂക്ഷിക്കുമ്പോള് മുലപ്പാല് സുരക്ഷിതമായി സംഭരിക്കാനും ഒരു വര്ഷത്തേക്ക് ഉപയോഗിക്കാനും കഴിയുമെന്നും മുതിര്ന്ന പൊതുജനാരോഗ്യ വിദഗ്ധന് ദീപക് ജെ ദാവെ പറഞ്ഞു.
അതേസമയം, താഴ്ന്ന വരുമാനക്കാരായ ആളുകളുമായി താരതമ്യപ്പെടുത്തുമ്പോള് സമൂഹത്തിന്റെ ഉയര്ന്ന തലത്തിലുള്ള സ്ത്രീകള് മുലപ്പാല് ദാനം ചെയ്യാന് തയ്യാറല്ലെന്ന് അദ്ദേഹം അഭിപ്രായപ്പെട്ടു. മുലപ്പാല് ബാങ്കുകള് ആരോഗ്യ സംരക്ഷണ സംവിധാനത്തിന്റെ ഒരു സുപ്രധാന ഘടകമായി കണക്കാക്കപ്പെടുന്നു. കൂടാതെ കുഞ്ഞുങ്ങളുടെയും കുടുംബങ്ങളുടെയും ആരോഗ്യത്തിനും ക്ഷേമത്തിനും പിന്തുണ നല്കുന്നതില് അവ ഒരു പ്രധാന പങ്ക് വഹിക്കുന്നു.
