എറണാകുളം: ആലുവയിൽ അഞ്ച് വയസുകാരിയെ തട്ടിക്കൊണ്ട് പോയി ക്രൂരമായ പീഡിനത്തിനിരയാക്കി കൊലപ്പെടുത്തിയ കേസിൽ അതിവേഗ വിചാരണ പൂർത്തിയായി കോടതി വിധി നവംബർ നാലിന്. എറണാകുളം പോക്‌സോ കോടതിയാണ് വിധി പറയുന്നത്. കേസിൽ 26 ദിവസമെടുത്താണ് വിചാരണ പൂർത്തിയാക്കുന്നത്.
ഈ കഴിഞ്ഞ ജൂലൈ 28-നാണ് ആലുവയിൽ അഞ്ച് വയസുകാരി ക്രൂരമായിപീഡനത്തിനിരയായി കൊല്ലപ്പെടുന്നത്. ബിഹാർ സ്വദേശി അസ്ഫാക് ആലമാണ് പ്രതി. ഒക്ടോബർ നാലിനാണ് കേസിൽ വിചാരണ ആരംഭിക്കുന്നത്. ബിഹാർ സ്വദേശികളായ ദമ്പതികളുടെ മകളെയാണ് പ്രതി ക്രൂരമായി പീഡിപ്പിച്ച് കൊലപ്പെടുത്തിയത്. ഇവർ താമസിക്കുന്ന വീടിന് സമീപമാണ് അസ്ഫാക് ആലവും താമസിച്ചിരുന്നത്. പ്രതി കുട്ടിയെ കൂട്ടിക്കൊണ്ട് പോകുന്നതടക്കമുള്ള സിസിടിവി ദൃശ്യങ്ങളും പുറത്ത് വന്നിരുന്നു. ക്രൂരമായ പീഡനത്തിന് വിധേയമാക്കിയ ശേഷമാണ് പ്രതി കുട്ടിയെ കൊലപ്പെടുത്തിയതെന്നാണ് പോസ്റ്റ്‌മോര്‍ട്ടം റിപ്പോര്‍ട്ട്. ആലുവ മാർക്കറ്റ് പരിസരത്ത് നിന്നും ചാക്കിൽ കെട്ടിയ നിലയിലാണ് പെൺകുട്ടിയുടെ മൃതദേഹം കണ്ടെടുത്തത്. പിന്നീട് സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. 2018 ല്‍ ദില്ലിയില്‍ പോക്‌സോ കേസില്‍ ജാമ്യം കിട്ടിയ പ്രതി അസ്ഫാക് അവിടെ നിന്ന് മുങ്ങുകയായിരുന്നു.
Discussion about this post