കർണാടക നിയമസഭയിലെ പ്രതിപക്ഷ നേതാവായി ആർ അശോകയെ ബിജെപി നിയമിച്ചതായി വിവരം. ഇന്ന് ചേർന്ന ബിജെപി നിയമസഭാ കക്ഷി യോഗത്തിന് ശേഷമാണ് തീരുമാനം. നേരത്തെ സുനിൽകുമാർ, അശ്വത് നാരായൺ, ആരാഗ ജ്ഞാനേന്ദ്ര എന്നിവരുടെ പേരുകൾ പ്രതിപക്ഷ നേതാവ് സ്ഥാനത്തേക്ക് പരിഗണിച്ചിരുന്നു. ഡിസംബർ 4 മുതൽ ബെലഗാവിയിൽ നിയമസഭയുടെ ശീതകാല സമ്മേളനം ആരംഭിക്കും. ഇതിന് മുന്നോടിയായാണ് ബിജെപിയുടെ തീരുമാനം. ജൂലൈയിൽ കർണാടക നിയമസഭയുടെ മുൻ സമ്മേളനം പ്രതിപക്ഷ നേതാവില്ലാതെയാണ് നടന്നത്.
കർണാടകയിൽ തിരഞ്ഞെടുപ്പ് നടന്ന് മാസങ്ങൾ പിന്നിട്ടിട്ടും പ്രതിപക്ഷ നേതാവിന്റെ നിയമനം വൈകുന്നതിൽ ഭരണകക്ഷിയായ കോൺഗ്രസിൽ നിന്ന് ബിജെപി കടുത്ത വിമർശനം നേരിട്ടിരുന്നു. മേയിൽ നടന്ന നിയമസഭാ തിരഞ്ഞെടുപ്പിൽ കോൺഗ്രസ് 135 സീറ്റുകളിലും ബിജെപി 66 സീറ്റുകളിലുമാണ് വിജയിച്ചത്. നേരത്തെ പ്രതിപക്ഷ നേതാവിനെ നിയമിക്കാത്ത പാർട്ടി നടപടിയിൽ അതൃപ്തി അറിയിച്ച് ബിജെപി എംഎൽഎമാർ രംഗത്തെത്തിയിരുന്നു. നിയമസഭാ തിരഞ്ഞെടുപ്പ് നടന്ന് ഏകദേശം ആറ് മാസത്തിന് ശേഷവും സംസ്ഥാനത്ത് ഇതുവരെ പ്രതിപക്ഷ നേതാവിനെ തിരഞ്ഞെടുത്തിട്ടില്ലെന്ന് ചൂണ്ടിക്കാട്ടിയായിരുന്നു വിമർശനം.
ഈ സാഹചര്യത്തിൽ മുതിർന്ന പാർട്ടി നേതാവ് ബിഎസ് യെദ്യൂരപ്പയുടെ നേതൃത്വത്തിൽ ചേർന്ന ആഭ്യന്തര യോഗത്തിൽ ബിജെപി എംഎൽഎമാർ കടുത്ത അതൃപ്തി അറിയിച്ചതായി അടുത്ത വൃത്തങ്ങൾ ഇന്ത്യാ ടുഡേയോട് പറഞ്ഞു. പ്രതിപക്ഷ നേതാവിനെ ഉടൻ നിയമിച്ചില്ലെങ്കിൽ ബെലഗാവിയിൽ നടക്കുന്ന ശീതകാല സമ്മേളനത്തിൽ പങ്കെടുക്കില്ലെന്ന് അംഗങ്ങൾ ഭീഷണി മുഴക്കിയതായും സൂചനയുണ്ട്.
ബംഗളൂരുവിൽ നടന്ന ആഭ്യന്തര യോഗത്തിൽ, പാർട്ടി ഇതുവരെ പ്രതിപക്ഷ നേതാവിനെ തീരുമാനിക്കാത്തതിനെ ചൊല്ലി കോൺഗ്രസ് നടത്തുന്ന നിരന്തരമായ പരിഹാസത്തിൽ തങ്ങൾക്ക് നാണക്കേടുണ്ടെന്ന് ബിജെപി എംഎൽഎമാർ പറഞ്ഞു. പ്രതിപക്ഷ നേതാവ് ഇല്ലാതെ ശീതകാല സമ്മേളനത്തിൽ പങ്കെടുക്കില്ലെന്ന് ബിജെപി എംഎൽഎമാരിൽ ഒരാൾ യെദ്യൂരപ്പയോട് അറിയിച്ചതായി പാർട്ടി വൃത്തങ്ങൾ പറഞ്ഞു.
അതേസമയം, ബെലഗാവിയിൽ നടക്കുന്ന ശീതകാല സമ്മേളനത്തിന് മുന്നോടിയായി പ്രതിപക്ഷ നേതാവിനെ നിയമിക്കാൻ ബിജെപി എല്ലാ ശ്രമങ്ങളും നടത്തുമെന്ന് വിഷയത്തോട് പ്രതികരിച്ചുകൊണ്ട് യെദ്യൂരപ്പ പറഞ്ഞിരുന്നു. തീരുമാനം പാർട്ടി ഹൈക്കമാൻഡിന് വിട്ടുവെന്നും അദ്ദേഹം അറിയിച്ചു.
Discussion about this post