രഞ്ജി ട്രോഫിയിൽ ഉത്തർപ്രദേശിനെതിരെ കേരളത്തിന് സമനില

ആലപ്പുഴ:രഞ്ജി ട്രോഫി ക്രിക്കറ്റിൽ കേരളം ഉത്തർപ്രദേശിനെതിരെ സമനിലയിൽ. രണ്ടാം ഇന്നിങ്സിൽ കേരളം രണ്ടിന് 72 റൺസാണ് എടുത്തത്. ആദ്യ ഇന്നിങ്സിൽ ഉത്തർപ്രദേശിന് മൂന്നും കേരളത്തിന് ഒരു പോയിന്റും ലഭിച്ചു. 383 എന്ന വലിയ ലക്ഷ്യമാണ് കേരളത്തിന് മുന്നിലുണ്ടായിരുന്നത്.
ഒന്നിന് 219 എന്ന നിലയിലാണ് ഉത്തർപ്രദേശ് ബാറ്റിംഗ് തുടങ്ങിയത് . 115 റൺസെടുത്ത ആര്യന്‍ ജുയാലിന്റെ വിക്കറ്റ് ആദ്യം നഷ്ടമായി. പ്രിയം ​ഗാർ​ഗും അക്ഷ്ദീപ് നാഥും മുന്നേറുകയായിരുന്നു . 106 റൺസെടുത്ത ​ഗാർഗ് പുറത്തായതിന് പിന്നാലെ ഉത്തർപ്രദേശ് ഇന്നിംഗ്സ് ഡിക്ലയർ ചെയ്തു. അക്ഷ്ദീപ് നാഥ് 38 റൺസെടുത്ത് പുറത്താകാതെ നിന്നു. രണ്ടാം ഇന്നിം​ഗ്സിൽ മൂന്ന് വിക്കറ്റ് നഷ്ടത്തിൽ 323 റൺസാണ് ഉത്തർപ്രദേശ് നേടിയത്.

ജലജ് സക്സേന, ബേസിൽ തമ്പി, ശ്രേയസ് ​ഗോപാൽ എന്നിവർ കേരളത്തിനു വേണ്ടി ഓരോ വിക്കറ്റ് വീതം വീഴ്ത്തി. രണ്ടാം ഇന്നിംഗ്സ് ബാറ്റിഗിനിറങ്ങിയ കേരളത്തിന് കൃഷ്ണ പ്രസാദിന്റെ വിക്കറ്റ് നഷ്ടമായി. ആദ്യ ഇന്നിം​ഗ്സിന് സമാനമായി രണ്ടാം ഇന്നിം​ഗ്സിലും കൃഷ്ണ പ്രസാദ് പൂജ്യത്തിന് പുറത്തായി. 42 റൺസെടുത്ത രോഹൻ കുന്നുമേലിന്റെ വിക്കറ്റാണ് കേരളത്തിന് രണ്ടാമതായി നഷ്ടപ്പെട്ടത്. രോഹൻ പ്രേം 29 റൺസെടുത്തും സച്ചിൻ ബേബി ഒരു റൺസെടുത്തും പുറത്താകാതെ നിൽക്കുകയായിരുന്നു.