കൊച്ചി: രാഹുല് മാങ്കൂട്ടത്തിന്റെ അറസ്റ്റില് യൂത്ത് കോൺഗ്രസ് പ്രതിഷേധം തുടരുന്നു. എറണാകുളം, പാലക്കാട് ജില്ലകളിലെ കളക്ടറേറ്റുകളിലേക്ക് ഇന്ന് യൂത്ത് കോണ്ഗ്രസ് പ്രവര്ത്തകര് മാര്ച്ച് നടത്തും. രാഹുലിന് ജാമ്യം ലഭിക്കുന്നതുവരെ ചെറുതും വലുതുമായ പ്രതിഷേധം സംഘടിപ്പിക്കാനാണ് സംസ്ഥാന കമ്മിറ്റിയുടെ തീരുമാനം.
വരും ദിവസങ്ങളില് കൂടുതല് ജില്ലകളിലേക്ക് പ്രതിഷേധം വ്യാപിപ്പിക്കും. ഇന്നലെ നടത്തിയ ക്ലിഫ്ഹൗസ് മാര്ച്ചില് പൊലീസിനു നേരെ കല്ലുകളും കമ്പുകളും വലിച്ചെറിഞ്ഞ പ്രവര്ത്തകര് മുഖ്യമന്ത്രിയുടെയും ഡിവൈഎഫ്ഐയുടെയും ഫ്ളക്സ് ബോര്ഡുകള് വ്യാപകമായി നശിപ്പിച്ചിരുന്നു. മുഖ്യമന്ത്രിയുടെ ഫ്ളക്സ് ബോര്ഡിലേക്ക് യൂത്ത് കോണ്ഗ്രസ് പ്രവര്ത്തകര് ചെളി വാരിയെറിയുകയും ചെയ്തു.
വി ടി ബല്റാമിന്റെ നേതൃത്വത്തിലാണ് യൂത്ത് കോണ്ഗ്രസ് പ്രവർത്തകർ ക്ലിഫ് ഹൗസ് മാര്ച്ച് നടത്തിയത്. നൂറുകണക്കിന് പ്രവര്ത്തകർ യൂത്ത് കോണ്ഗ്രസിന്റെ സമരജ്വാലയില് പങ്കൈടുത്തിരുന്നു.പ്രതിഷേധംകണക്കിലെടുത്ത് വന് സുരക്ഷ പൊലീസ് ഒരുക്കിയിരുന്നെങ്കിലും കല്ലും വടിയും എറിഞ്ഞ് പൊലീസുകാരെ പ്രകോപിപ്പിക്കാന് പ്രവര്ത്തകര് ശ്രമിക്കുകയായിരുന്നു. പ്രതിഷേധക്കാര് ബാരിക്കേഡിന് മുകളില് തീപ്പന്തം സ്ഥാപിക്കുകയും മുഖ്യമന്ത്രിയുടെ ഫ്ളക്സ് ബോര്ഡുകള് തകര്ക്കുകയും ചെയ്തു.
