അസം: കോണ്‍ഗ്രസ് നേതാവ് രാഹുല്‍ ഗാന്ധി നയിക്കുന്ന ‘ഭാരത് ന്യായ് യാത്ര’യ്ക്കെതിരെ അസം പോലീസ് കേസെടുത്തു. യാത്രാ റൂട്ടുമായി ബന്ധപ്പെട്ട സംസ്ഥാന സര്‍ക്കാരിന്റെ മാര്‍ഗനിര്‍ദേശങ്ങള്‍ ലംഘിച്ചുവെന്നാരോപിച്ചാണ് നടപടി. വ്യാഴാഴ്ച ഉച്ചയോടെ യാത്ര ജോര്‍ഹട്ട് ടൗണിലൂടെ കടന്നുപോകുമ്പോള്‍ നിയുക്ത നിര്‍ദ്ദേശങ്ങളില്‍ തെറ്റിച്ച് ചാര്‍ട്ട് ചെയ്യാത്ത റൂട്ടിലൂടെ സഞ്ചരിച്ചു. പെട്ടെന്ന് റൂട്ട് മാറ്റിയത് തടസ്സങ്ങള്‍ക്ക് ഇടയാക്കിയെന്ന് പൊലീസ് പറയുന്നു. കെബി ബൈജിയു ഉള്‍പ്പെടെയുള്ള സംഘാടകര്‍ ട്രാഫിക് ബാരിക്കേഡുകള്‍ തകര്‍ക്കാന്‍ ജനക്കൂട്ടത്തെ പ്രേരിപ്പിച്ചെന്നും പൊലീസ് ആരോപിച്ചു. കൂടാതെ ഡ്യൂട്ടിയിലുണ്ടായിരുന്ന പോലീസ് ഉദ്യോഗസ്ഥരെ ഇവര്‍ ആക്രമിച്ചെന്നും പോലീസ് കൂട്ടിച്ചേർത്തു.
അതേ സമയം യാത്രയ്ക്ക് മുമ്പ് അനാവശ്യ തടസ്സങ്ങള്‍ സൃഷ്ടിക്കാനുള്ള തന്ത്രമാണ് എഫ്ഐആര്‍ എന്ന് അസം പ്രതിപക്ഷ നേതാവ് ദേബബ്രത സൈകിയ ആരോപിച്ചു. പി.ഡബ്ല്യു.ഡി പോയിന്റില്‍ ട്രാഫിക്ക് വഴിതിരിച്ചുവിടാന്‍ ഒരു പോലീസുകാരും ഉണ്ടായിരുന്നില്ല. നിയുക്ത റൂട്ട് വളരെ ചെറുതായിരുന്നു. അതിനാല്ലാണ്, ഞങ്ങള്‍ ഏതാനും മീറ്ററുകളോളം വഴിമാറിനടന്നതെന്ന് അദ്ദേഹം വ്യക്തമാക്കി.
രാഹുൽ ഗാന്ധി നയിക്കുന്ന യാത്ര പ്രത്യയശാസ്ത്രപരമാണെന്നും തിരഞ്ഞെടുപ്പ് ലക്ഷ്യം വെച്ചല്ലെന്നുമാണ് കോൺഗ്രസിന്റെ വാദം. യാത്രയുടെ പ്രധാന ശ്രദ്ധാകേന്ദ്രം ഉത്തർപ്രദേശാണ്. ജാർഖണ്ഡിലും അസമിലും എട്ട് ദിവസം നീണ്ടുനിൽക്കുന്ന യാത്ര മധ്യപ്രദേശിൽ ഏഴ് ദിവസം തുടരും. ജനുവരി 25 വരെ ജാഥയുടെ അസം പര്യടനം തുടരും. 17 ജില്ലകളിലായി 833 കിലോമീറ്റര്‍ ദൂരം സഞ്ചരിക്കുമെന്നാണ് വിവരം.
Discussion about this post