ഇസ്‌ലാമാബാദ്: ഭീകരത്താവളങ്ങൾ പരസ്പരം ആക്രമിച്ചുണ്ടായ സംഘർഷാവസ്ഥ പരിഹരിക്കാനൊരുങ്ങി ഇറാനും പാകിസ്താനും. പ്രതിസന്ധി
ഇല്ലാതാകാൻ ഇരുരാജ്യങ്ങളും തമ്മിൽ തീരുമാനമായി. നയതന്ത്ര – രാഷ്ട്രീയ ബന്ധം കൂടുതൽ വഷളായ പശ്ചാത്തലത്തിൽ ഇരുരാജ്യങ്ങളുടെയും വിദേശകാര്യ ഉദ്യോഗസ്ഥർ തമ്മിൽ സംഘർഷം ലഘൂകരിക്കാൻ സന്ദേശങ്ങൾ കൈമാറിയിരുന്നു. അതിന്റെ ഫലമായാണ് വിദേശകാര്യ മന്ത്രിമാര്‍ വിഷയത്തിൽ ഇടപെടുന്നത്. പാകിസ്താൻ വിദേശകാര്യമന്ത്രി ജലീൽ അബ്ബാസ് ജിലാനിയും ഇറാൻ വിദേശമന്ത്രി ഹൊസ്സൈൻ അമിർ അബ്ദുള്ളഹിയാനും ഇന്നലെ ഫോണിൽ സംസാരിച്ചതിന് പിന്നാലെയാണ് തീരുമാനം.
പാകിസ്താനും ഇറാനും തമ്മിലുള്ളത് സഹോദരബന്ധമാണെന്നും ചർച്ചയിലൂടെ എല്ലാപ്രശ്നങ്ങളും പരിഹരിക്കുമെന്നും പാക് അഡീഷണൽ വിദേശകാര്യ സെക്രട്ടറി റഹീം ഹയാത്ത് ഖുറേഷി നേരത്തെ വ്യക്തമാക്കിയിരുന്നു. അതേ സമയം സംഘർഷവുമായി ബന്ധപ്പെട്ട് പാക് പ്രധാനമന്ത്രി അൻവറുൾ ഹഖ് കാകർ പ്രത്യേക സുരക്ഷായോഗം വിളിച്ചു. സൈനികമേധാവികളും രഹസ്യാന്വേഷണ ഉദ്യോഗസ്ഥരും യോഗത്തിൽ പങ്കെടുത്തിരുന്നുവെന്നാണ് റിപ്പോർട്ടുകൾ. ഇസ്രയേൽ-ഹമാസ് യുദ്ധത്തെത്തുടർന്ന് പശ്ചിമേഷ്യയിൽ തുടരുന്ന അരക്ഷിതാവസ്ഥ ദക്ഷിണേഷ്യയിലേക്കും വ്യാപിക്കും വിധമാണ് രണ്ടുദിവസത്തിനിടെ ഇറാൻ-പാകിസ്താൻ സംഘർഷം കത്തിപ്പടർന്നത്.
Discussion about this post