യുഎഇയിൽ മോദി അവതരിപ്പിച്ച ജയ്‌വാൻ റുപേ കാർഡ്; പ്രത്യേകതകൾ എന്തൊക്കെ? പ്രവാസികൾക്കുള്ള നേട്ടവും!

ഇന്ത്യയും യുഎഇയും തമ്മിലുള്ള ഉഭയകക്ഷി ബന്ധവും സാമ്പത്തിക സഹകരണവും ശക്തിപ്പെടുത്തുന്നതിന്റെ ഭാഗമായി നിരവധി കരാറുകളിലാണ് കഴിഞ്ഞ ദിവസം ഇരു രാഷ്ട്രങ്ങളുടേയും നേതാക്കൾ ഒപ്പിട്ടത്.

രണ്ട് ദിവസത്തെ ഔദ്യോഗിക സന്ദർശനത്തിന് എത്തിച്ചേർന്ന ഇന്ത്യൻ പ്രധാനമന്ത്രി നരേന്ദ്ര മോദിയുടെയും യുഎഇ പ്രസിഡന്റ് മുഹമ്മദ് ബിൻ സെയ്ദ് അൽ നഹ്യാന്റേയും സാന്നിധ്യത്തിൽ ഒപ്പിട്ട കരാറുകളിൽ ഏറ്റവും ശ്രദ്ധേയമായത് രണ്ട് രാജ്യങ്ങളുടേയും ഇൻസ്റ്റന്റ് പേയ്മെന്റ് പ്ലാറ്റ്ഫോമുകൾ‌ തമ്മിൽ പരസ്പരം ബന്ധിപ്പിക്കുന്നതിനുള്ള തീരുമാനമായിരുന്നു.

ആഗോള തലത്തിൽ ഇന്ന് ശ്രദ്ധാകേന്ദ്രമായിക്കൊണ്ടിരിക്കുന്നതും ഉപഭോക്താക്കളുടെയും ഇടപാടുകളുടേയും എണ്ണത്തിൽ ലോകത്ത് ഒന്നാം സ്ഥാനത്ത് നിൽക്കുന്നതുമായ ഇന്ത്യയു‌ടെ യൂണിഫൈഡ് പേയ്മെന്റ്സ് ഇന്റർഫേസ് (UPI) സംവിധാനം അഥവാ യുപിഐയും യുഎഇയുടെ അഡ്വാൻസ്ഡ് ഏലിയന്റ് നെറ്റ്‍വർക്ക് ഇന്റർഫേസ് (AANI) സംവിധാനം അഥവാ എഎഎൻഐയും തമ്മിൽ സംയോജിപ്പിക്കുന്നതിനുള്ള കരാറാണ് നിലവിൽ വന്നത്.

കരാറിലൂടെ ലഭിക്കുന്ന നേട്ടങ്ങൾ?

യുപിഐയും എഎഎൻഐയും തമ്മിൽ പരസ്പരം ബന്ധിപ്പിക്കുന്നതോടെ യുഎഇയിലെ ഇന്ത്യൻ പ്രവാസികൾക്ക് അതിവേഗത്തിലും താരതമ്യേന എളുപ്പത്തിലും പണമിടപാട് നടത്താനും പണകൈമാറ്റത്തിനുള്ള ചെലവ് കുറയ്ക്കാനും സഹായിക്കും. യുഎഇയും ഇന്ത്യയും തമ്മിലുള്ള സാമ്പത്തിക സഹകരണം ശക്തിപ്പെടുത്താനും വ്യാപാര ബന്ധം വളർത്താനും ടൂറിസം മേഖലയ്ക്കും ഗുണകരമാണ്. ഇതിനോടൊപ്പം റുപേ അധിഷ്ഠിത ജയ്‌വാന്‍ കാർഡും അവതരിപ്പിച്ചു. ജയ്‌വാന്‍ കാർഡിന്റെ വിശദാംശം ചുവടെ ഉൾപ്പെടുത്തുന്നു.

ഇന്ത്യ തദ്ദേശീയമായി വികസിപ്പിച്ച ഇല‌ക്ട്രോണിക് ഫണ്ട് ട്രാൻസ്ഫർ സാങ്കേതിക വിദ്യയായ റൂപേ (RuPay) അടിസ്ഥാനമാക്കി യുഎഇ അവതരിപ്പിക്കുന്ന ക്രെഡിറ്റ്, ഡെബിറ്റ് കാർഡ് ശൃംഖലയാണ് ജയ്‌വാന്‍ (JAYWAN). ആഗോള ബ്രാൻഡുകളായ വിസ, മാസ്റ്റർ കാർഡ് എന്നിവയുമായി കിടപിടിക്കുന്ന കാർഡ് പേയ്മെന്റ് സംവിധാനമായി ഇന്ന് ലോകം ശ്രദ്ധിക്കുന്ന ശൃംഖലയാണ് റുപേയുടേത്. നിരവധി സുരക്ഷാ ഫീച്ചറുകൾ റുപേയിൽ ഉണ്ടെന്നതാണ് ഇതിനെ വേറിട്ടതാക്കുന്നത്.

എന്താണ് ജയ്‌വാന്‍ കാർഡിന്റെ ലക്ഷ്യം?

യുഎഇയുടെ പരിധിക്കുളളിൽ ആഭ്യന്തര ഇടപാടുകൾ (ട്രാൻസാക്ഷൻ) നടത്തുന്നതിനായാണ് ജയ്‌വാന്‍ കാർഡ് രൂപകൽപന ചെയ്തിരിക്കുന്നത്. നിലവിൽ യുഎഇയിലെ നാല് ബാങ്കുകളാണ് ഈ കാർഡ് വിതരണം ചെയ്യുന്നത്. അബുദാബി ബാങ്ക്, അബുദാബി കൊമേഷ്യൽ ബാങ്ക്, മഷ്റീഖ് ബാങ്ക്, കൊമേഷ്യൽ ബാങ്ക് ഓഫ് ദുബായ്‌‌‌ തുടങ്ങിയ ബാങ്കുകളാണ് ജയ്‌വാന്‍ കാർഡ് നൽകുന്നത്. ഇന്ത്യൻ കാർഡ് പേയ്മെന്റ് ശൃംഖലയായ റുപേയാണ് ജയ്‌വാന്‍ കാർഡിനു വേണ്ട നെറ്റ്‍വർക്ക് സജ്ജമാക്കുന്നത്.

കോൺടാക്ട്‍ലെസ് പണമിടപാട്, പ്രത്യേക വിഭാഗങ്ങളിൽ ക്യാഷ്ബാക്ക് ആനുകൂല്യങ്ങൾ, തെരഞ്ഞെ‌ടുത്ത കടകളിൽ ഡിസ്കൗണ്ട് ഓഫറുകൾ, തട്ടിപ്പ് ത‌‌ടയാനുള്ള സംവിധാനം, സുരക്ഷിത ഓൺലൈൻ പണമിടപാട് എന്നിവയൊക്കെയാണ് ജയ്‌വാന്‍ കാർഡിന്റെ ഗുണവശങ്ങൾ.

ആർക്കൊക്കെ ലഭിക്കും?

സാധുതയുള്ള എമിറേറ്റ്സ് തിരിച്ചറിയിൽ രേഖ കൈവശമുള്ളവരും യുഎഇയിൽ താമസിക്കുന്നവരുമായ എല്ലാവർക്കും ജയ്‌വാന്‍ കാർഡിന് അപേക്ഷിച്ചാൽ ലഭ്യമാകും.