തിരുവനന്തപുരം: ഭാരത് അരി സംസ്ഥാനത്ത് എല്ലാ ജില്ലകളിലും ഈ ആഴ്ച എത്തും. ഇനി ചെറിയ ടെമ്പോകളിലല്ല, കേരളത്തിലെ 14 ജില്ലകളിലും വലിയ ലോറികളിലാകും അരി കൊണ്ടുവന്ന് വില്‍ക്കുക. കവലകളില്‍ കൊണ്ടുവന്ന് അഞ്ച് കിലോയുടെയും പത്ത് കിലോയുടെയും അരി പായ്ക്കറ്റുകള്‍ വില്‍ക്കും. ഇതാണ് കേന്ദ്ര സര്‍ക്കാരിന്‍റെ പ്ലാന്‍ എയും പ്ലാന്‍ ബിയുമെല്ലാം.
കടകളിലൂടെയുള്ള വില്‍പ്പനയാണ് അടുത്ത ഘട്ടം. കാലടിയിലെ മില്ലില്‍ 10,0000 ടണ്‍ അരി റെഡിയായിട്ടുണ്ട്. ഇനി പച്ചരി ആയിരിക്കും ലഭിക്കുകയെന്ന് മാതൃഭൂമി ന്യൂസ് റിപ്പോര്‍ട്ട് ചെയ്തു. ഭാരത് അരി വാങ്ങാന്‍ റേഷന്‍ കാര്‍ഡ് ആവശ്യമില്ല. ഒരു മൊബൈല്‍ നമ്പര്‍ മതി പത്ത് കിലോ അരി കിട്ടാന്‍. ഒരു നമ്പരിന് പത്ത് കിലോ അരി വീതം ലഭിക്കും.
തൃശൂര്‍ ജില്ലയ്ക്ക് പിന്നാലെ ഭാരത് അരിയുടെ വില്‍പ്പന വ്യാഴാഴ്ച (ഇന്നലെ) മുതല്‍ പാലക്കാട് ജില്ലയില്‍ ആരംഭിച്ചു. 29 രൂപ നിരക്കില്‍ കേന്ദ്ര സര്‍ക്കാര്‍ അവതരിപ്പിച്ച അരിയാണ് ഭാരത് അരി. പാലക്കാട് സ്റ്റേഡിയം ബസ് സ്റ്റാന്‍ഡ് പരിസരത്ത് നിന്ന് ഇന്നലെ രാവിലെ 10 മണി മുതല്‍ അരി പൊതുജനങ്ങള്‍ക്ക് ലഭ്യമാക്കി. ഒറ്റത്തവണ ഒരാള്‍ക്ക് പത്ത് കിലോ വരെ അരി ലഭിക്കും. ഭാരത് അരിയ്ക്കൊപ്പം കടലപരിപ്പും വിതരണം ചെയ്യുന്നുണ്ട്. കിലോഗ്രാമിന് 60 രൂപയാണ് കടലപ്പരിപ്പിന്‍റെ വില. എഫ്സിഐ ഗോഡൗണുകളില്‍ നിന്ന് അരിയും പരിപ്പും പ്രത്യേകം പായ്ക്ക് ചെയ്താണ് ജനങ്ങള്‍ക്ക് നല്‍കുന്നത്.
തൃശൂര്‍, അങ്കമാലി എഫ്സിഐ ഗോഡൗണുകളില്‍ നിന്നുള്ള അരി എറണാകുളം കാലടിയിലെ മില്ലില്‍ പോളീഷ് ചെയ്ത ശേഷമാണ് പായ്ക്ക് ചെയ്യുന്നത്. പൊതുവിപണിയില്‍ 42 രൂപ വിലയുള്ള പൊന്നി അരിയാണ് 29 രൂപയ്ക്ക് തൃശൂരില്‍ ജനങ്ങള്‍ക്ക് വിതരണം ചെയ്തത്. നാഷണല്‍ അഗ്രികള്‍ച്ചറല്‍ കോ- ഓപ്പറേറ്റീവ് മാര്‍ക്കറ്റിങ് ഫെഡറേഷന്, നാഷണല്‍ കോ- ഓപ്പറേറ്റീവ് കണ്‍സ്യൂമേഴ്സ് ഫെഡറേഷന്, കേന്ദ്രീയ ഭണ്ഡാര്‍ ഔട്ട്ലെറ്റുകള്‍ എന്നിവ വഴിയാണ് ഭാരത് അരിയുടെ വില്‍പ്പന കേരളത്തില്‍ നടത്തുന്നത്. കിലോയ്ക്ക് 27.50 രൂപയ്ക്ക് ഭാരത് ആട്ടയും 60 രൂപയ്ക്ക് കടലപരിപ്പും 29 രൂപയ്ക്ക് ഭാരത് അരിയുമാണ് കേന്ദ്ര സര്‍ക്കാര്‍ വിപണിയിലെത്തിച്ചത്. രാജ്യത്ത് പട്ടിണി പൂര്‍ണമായും തുടച്ചു നീക്കുകയെന്നതാണ് ഇതിലൂടെ ലക്ഷ്യമിടുന്നത്.
Discussion about this post