കോഴിക്കോട്: വയനാട്ടില് കാട്ടാന ആക്രമണത്തില് ഗുരുതരമായി പരിക്കേറ്റ പാക്കം സ്വദേശി വെള്ളച്ചാലില് പോളിന്റെ ജീവന് രക്ഷിക്കാനായില്ല. കോഴിക്കോട് മെഡിക്കല് കോളേജ് ആശുപത്രിയില് എത്തിച്ച പോളിനെ തീവ്രപരിചരണ വിഭാഗത്തിലേക്ക് മാറ്റി, പിന്നാലെ മരിക്കുകയായിരുന്നു. 3.25-ഓടെയാണ് മരിച്ചത്. കുറുവാ ദ്വീപ് ഇക്കോ ടൂറിസം ജീവനക്കാരനാണ് പോളി.
വെള്ളിയാഴ്ച രാവിലെ 9.30-ഓടെയാണ് പോളിന് കാട്ടാനയുടെ കുത്തേറ്റത്. പാക്കം- കുറുവാ ദ്വീപ് റൂട്ടില് ചെറിയമല വനമേഖലയില് വെച്ചാണ് പോളിനെ കാട്ടാന ആക്രമിച്ചത്. കുറുവാ ദ്വീപ് വനസംരക്ഷണ സമിതി ജീവനക്കാരനായ പോള് ജോലിക്കു പോകുന്ന വഴി കാട്ടാന കൂട്ടത്തിന് മുന്നില്പ്പെടുകയായിരുന്നു. തുടര്ന്ന് ഭയന്നോടിയപ്പോള് കമിഴ്ന്ന് വീണെന്നും പിന്നാലെ വന്ന കാട്ടാന ചവിട്ടിയെന്നുമാണ് പോള് പറയുന്നത്. സംഭവമറിഞ്ഞ് സ്ഥലത്തെത്തിയ സഹപ്രവര്ത്തകരാണ് പോളിനെ ആശുപത്രിയിലെത്തിച്ചത്.
കാട്ടനയുടെ ആക്രമണത്തിൽ പരിക്കേറ്റ് വയനാട് മെഡിക്കല് കോളേജില് പ്രവേശിച്ച പോളിന്റെ ആരോഗ്യ സ്ഥിതി മോശമായതിനെ തുടര്ന്നാണ് റോഡ് മാര്ഗ്ഗം കോഴിക്കോട് മെഡിക്കല് കോളേജ് ആശുപത്രിയില് എത്തിച്ചത്. ഒരുമണിക്കൂര് 57 മിനിറ്റ് എടുത്താണ് റോഡ് മാര്ഗ്ഗം പോളിനെ കോഴിക്കോട് മെഡിക്കല് കോളേജില് എത്തിച്ചത്. പോളിനെ അടിയന്തിര ശസ്ത്രക്രിയയ്ക്ക് വിധേയമാക്കാനുള്ള എല്ലാ സജ്ജീകരണങ്ങളും ഇവിടെ ഒരുക്കിയിരുന്നു. എന്നാല് കോഴിക്കോട് മെഡിക്കല് കോളേജ് ക്യാഷ്വാലിറ്റിയില് പ്രവേശിപ്പിക്കപ്പെട്ട പോളിന്റെ മരണം ഡോക്ടര്മാര് സ്ഥിരീകരിക്കുകയായിരുന്നു.
