ജയ്പൂര്‍: കോണ്‍ഗ്രസ് മുന്‍ അധ്യക്ഷ സോണിയാ ഗാന്ധിക്ക് 12.53 കോടി രൂപയുടെ ആസ്തി. 72 ലക്ഷം രൂപയുടെ വര്‍ധനവാണ്ണു അഞ്ചുവര്‍ഷം കൊണ്ടുണ്ടായത്. രാജ്യസഭാ തെരഞ്ഞെടുപ്പിനുള്ള നാമനിര്‍ദേശ പത്രികയ്‌ക്കൊപ്പം സമര്‍പ്പിച്ച സത്യവാങ്മൂലത്തിലാണ് സ്വത്ത് വിവരങ്ങളുടെ വെളിപ്പെടുത്തിൽ.
സോണിയയുടെ കൈവശം 88 കിലോ വെള്ളിയും 1.26 കിലോ സ്വര്‍ണാഭരണങ്ങളുമുണ്ട്. ദേരാ മാണ്ഡി ഗ്രാമത്തില്‍ സോണിയയ്ക്ക് 2529.28 ചതുരശ്ര മീറ്റര്‍ കൃഷിഭൂമിയുണ്ട്. അതിന്റെ മൊത്തം വിപണി മൂല്യം 5.88 കോടി രൂപയാണ്. ഇറ്റലിയിൽ പാരമ്പര്യ അവകാശമായി സോണിയക്ക് 27 ലക്ഷം രൂപ വില മതിക്കുന്ന വീടുണ്ടെന്നും സത്യവാങ്മൂലത്തില്‍ പറയുന്നു. എന്നാൽ ഇന്ത്യയിൽ വീടോ വാഹനങ്ങളോ സോണിയാ ഗാന്ധിയുടേ പേരിലില്ല.
എം പി എന്ന നിലയിലുള്ള ശമ്പളം, റോയല്‍റ്റി വരുമാനം, ബാങ്ക് നിക്ഷേപങ്ങളുടെ പലിശ, മ്യൂച്വല്‍ ഫണ്ടുകളില്‍ നിന്നുള്ള ലാഭവിഹിതം, മൂലധന നേട്ടം എന്നിവയെക്കുറിച്ചുള്ള വിവരങ്ങളും സത്യവാങ്മൂലത്തില്‍ നൽകിയിട്ടുണ്ട്.
പുസ്തകങ്ങളില്‍ നിന്നുള്ള റോയല്‍റ്റിയും വരുമാനത്തിലുണ്ട്. പെന്‍ഗ്വിന്‍ ബുക്ക് ഇന്ത്യ, ഓക്‌സ്‌ഫോര്‍ഡ് യൂണിവേഴ്‌സിറ്റി പ്രസ്സ്, ആനന്ദ പബ്ലിഷേഴ്‌സ്, കോണ്ടിനെന്റല്‍ പബ്ലിക്കേഷന്‍സ് എന്നിവയുമായാണ് കരാര്‍. കോടി കണക്കിന് സ്വത്തുണ്ടെങ്കിലും സ്വന്തമായി വാഹനങ്ങളൊന്നുമില്ലെന്ന് സത്യവാങ്മൂലത്തില്‍ പറയുന്നു.രാജസ്ഥാനില്‍ നിന്നാണ് സോണിയാ ഗാന്ധി മത്സരിക്കുന്നത്.
Discussion about this post