കശ്‌മീര്‍: ഭൂമിയിലെ സ്വര്‍ഗമായ കശ്‌മീരിന്‍റെ സൗന്ദര്യവും സച്ചിന്‍ ടെന്‍ഡുല്‍ക്കര്‍ എന്ന ക്രിക്കറ്റ് മാസ്‌മരികതയും ഒത്തുചേർന്ന് ഒരു കാഴ്ച. ഇന്ത്യയിലെ ഏറ്റവും ഉയരം കൂടിയ ഇടങ്ങളിലൊന്നായ കശ്‌മീരില്‍ നാട്ടുകാരായ യുവാക്കൾക്കൊപ്പം നടുറോഡില്‍ ബാറ്റ് ചെയ്ത് ക്രിക്കറ്റ് ഇതിഹാസം സച്ചിൻ ടെന്‍ഡുല്‍ക്കര്‍. കശ്‌മീര്‍ സന്ദര്‍ശനത്തിലെ ക്രിക്കറ്റ് കളിയുടെ വീഡിയോ ആരാധകര്‍ക്കായി സച്ചിന്‍ സാമൂഹ്യമാധ്യമങ്ങളില്‍ പങ്കുവെക്കുകയും ചെയ്യ്തു. ജമ്മു കശ്മീരിലെ ഗുൽമർഗ് സന്ദർശനത്തിനിടെയാണ് സംഭവം.
കാറില്‍ നിന്ന് നേരെയിറങ്ങി സച്ചിന്‍ ബാറ്റ് ഏറ്റെടുക്കുകയായിരുന്നു. തന്‍റെ തലമുറയിലെ ലോകോത്തര ബൗളര്‍മാരെയെല്ലാം നിഷ്കരുണം പായിച്ച ചരിത്രമുള്ള സച്ചിന്‍ എല്ലാ പന്തും അനായാസം നേരിട്ടു. തന്‍റെ ട്രേഡ്‌മാര്‍ക്ക് സ്ട്രൈറ്റ് ഡ്രൈവ് തന്നെയായിരുന്നു ഇതിലെ ഹൈലൈറ്റ്. ബാറ്റ് തലതിരിച്ചു പിടിച്ച് പിടി കൊണ്ട് പന്തടിച്ചു തെറിപ്പിച്ച് സച്ചിന്‍ നാട്ടുകാരെ വിസ്‌മയിപ്പിച്ചു.
‘ക്രിക്കറ്റ് ആന്‍ഡ് കശ്‌മീര്‍: എ മാച്ച് ഇന്‍ ഹെവന്‍’ എന്ന തലക്കെട്ടോടെയാണ് സച്ചിന്‍റെ വീഡിയോ പങ്കു വച്ചത്. ഗുൽമർഗിലെ യുവാക്കള്‍ക്കൊപ്പം ബാറ്റ് ചെയ്ത സച്ചിന്‍ ടെന്‍ഡുല്‍ക്കര്‍ അവരുമായി കുശലം പങ്കിടുകയും സെല്‍ഫി എടുക്കുകയും ചെയ്യുന്നുണ്ട്. സച്ചിനായി കനത്ത സുരക്ഷയാണ് ഇവിടെ ഒരുക്കിയിരിക്കുന്നതും വീഡിയോയില്‍ കാണാം. ഗുല്‍മര്‍ഗിലെ യുവാക്കള്‍ക്ക് മറക്കാനാവാത്ത അനുഭവമായി സച്ചിന്‍ ടെന്‍ഡുല്‍ക്കര്‍ക്ക് ഒപ്പമുള്ള ക്രിക്കറ്റ്. കശ്മീരിലെ ബാറ്റ് നിര്‍മാണ കേന്ദ്രങ്ങളിലൊന്നില്ലും സച്ചിന്‍ സന്ദര്‍ശിച്ചു.
Discussion about this post