ആലപ്പഴ: വീണ്ടും മൈക്കിന് മുന്നിൽ കുടുങ്ങി കെപിസിസി അധ്യക്ഷന് കെ. സുധാകരന്. മാധ്യമപ്രവർത്തകരെ വിളിച്ചു വരുത്തിയിട്ട് പ്രതിപക്ഷ നേതാവ് എവിടെ എന്ന് ചോദിച്ച സുധാകരൻ, തുടർന്ന് ചില അശ്ലീല പദപ്രയോഗവും നടത്തി. ‘സമരാഗ്നി’യുടെ ഭാഗമായി ആലപ്പുഴയില് വാര്ത്താസമ്മേളനം നടത്തുന്നതിനായി സതീശന് എത്താന് വൈകിയതാണ് സുധാകരനെ പ്രകോപിപ്പിച്ചത്.
മൈക്ക് ഓണാണെന്നും ക്യാമറയുണ്ടെന്നും ഓര്മിപ്പിച്ച് ഷാനിമോള് ഉസ്മാനടക്കമുള്ള നേതാക്കള് സുധാകരനെ കൂടുതല് സംസാരിക്കുന്നതില് നിന്ന് തടഞ്ഞു. പ്രതിപക്ഷ നേതാവ് വി.ഡി.സതീശന് മറ്റൊരു പരിപാടി ഉള്ളതിനാല് പത്രസമ്മേളനത്തിന് എത്താൻ വൈകിയിരുന്നു. പ്രതിപക്ഷ നേതാവിനെ കാത്ത് കെപിസിസി പ്രസിഡന്റ് ഇരുന്നത് 20 മിനിറ്റ്. തുടര്ന്ന് ബാബു പ്രസാദിനോട് സതീശന് എവിടെയെന്ന് സുധാകരന് തിരക്കി, ‘ഒന്ന് വിളിച്ച് നോക്കാന് പറ, ഇയാൾ എവിടെയെന്ന്. ഇയാള് എന്ത്…(തെറി) പത്രക്കാരോട് വിളിച്ചു വരുത്തിയിട്ട്, എന്തൊരു മോശമാണിത്’, എന്ന സുധാകരന് പറയുന്നതാണ് മൈക്കിൽ പിടിച്ചത്.
10 മണിക്കു നിശ്ചയിച്ച പത്രസമ്മേളനത്തിനു സുധാകരനും വൈകിയാണ് എത്തിയത്. എത്തിയപ്പോൾ തന്നെ അദ്ദേഹം മാധ്യമപ്രവർത്തകരോടു ഖേദം അറിയിച്ചു. തുടർന്നു സതീശനെ കാത്തിരുന്നപ്പോഴാണ് അദ്ദേഹം അസ്വസ്ഥനായത്. ഇതിന് മുൻപ് വാര്ത്തസമ്മേളനത്തിൽ മൈക്കിനും കാമറയ്ക്കും മുന്നിൽവെച്ച് സുധാകരനും സതീശനും തമ്മിലുള്ള അസ്വാരസ്യം പ്രകടമായത് വാർത്തയായിരുന്നു.
