മലപ്പുറം: തിരൂരില്‍ കൊല്ലപ്പെട്ട 11 മാസം പ്രായമായ കുഞ്ഞിന്റെ മൃതദേഹം കണ്ടെത്തി. തൃശ്ശൂർ റെയിൽവേ സ്റ്റേഷന് സമീപമുള്ള ഓടയിൽ നിന്നാണ് മൃതദേഹം ലഭിച്ചത്. ബാഗിൽ ഉപേക്ഷിച്ച നിലയിലായിരുന്നു മൃതദേഹം. കൊലപാതക വിവരം ലഭിച്ചയുടൻ തിരൂരിൽ നിന്നുള്ള പോലീസ് സംഘം യുവതിയെ തൃശ്ശൂരിൽ എത്തിച്ച് നടത്തിയ പരിശോധനയിലാണ് മൃതദേഹം കണ്ടെത്തിയത്. മൃതദേഹം കുട്ടിയുടേതെന്ന് ഉറപ്പിക്കാൻ ഡിഎൻഎ പരിശോധന ഉൾപ്പെടെ നടത്തും.
തൃശ്ശൂർ റെയിൽവേ സ്റ്റേഷന്റെ രണ്ടാമത്തെ പ്രവേശന കവാടത്തിന് സമീപമുള്ള ഓടയിൽ നിന്നാണ് മൃതദേഹവശിഷ്ടം ലഭിച്ചത്. കുട്ടിയെ തിരൂരിൽ വച്ച് കൊലപ്പെടുത്തിയ ശേഷം ബാഗിലാക്കി ട്രെയിനിൽ എത്തി ഇവിടെ ഉപേക്ഷിക്കുകയായിരുന്നു എന്നാണ് മൊഴി. മൂന്ന് മാസം മുമ്പാണ് പോണ്ടിച്ചേരി കൂടല്ലൂര്‍ സ്വദേശിനി ശ്രീപ്രിയയുടെ കുഞ്ഞിനെ കാമുകൻ ജയസൂര്യനും പിതാവും ചേർന്ന് കൊലപ്പെടുത്തിയത്.
മൂന്ന് മാസം മുൻപാണ് ഭർത്താവ് മണിപാലനെ ഉപേക്ഷിച്ചു ശ്രീപ്രിയ കാമുകന് ഒപ്പം പോയത്. ഇവർക്ക് 11 മാസം പ്രായമായ കുട്ടി ഉണ്ടായിരുന്നു. ഇതിനിടെ കുഞ്ഞിനെ അന്വേഷിച്ചു ഭർത്താവ് തിരൂരിൽ എത്തിയപ്പോഴാണ് വിവരം പുറത്തറിയുന്നത്. കുട്ടിയെക്കുറിച്ച് ചോദിച്ചപ്പോള്‍ പരസ്പര വിരുദ്ധമായ കാര്യങ്ങളാണ് ശ്രീപ്രിയ പറഞ്ഞത്. സംശയം തോന്നിയതോടെ ഇയാൾ പൊലീസിനെ വിവരം അറിയിച്ചു. തുടർന്ന് പൊലീസെത്തി നടത്തിയ ചോദ്യം ചെയ്യലിൽ കുട്ടിയെ കാമുകനും പിതാവും ചേര്‍ന്ന് കൊലപ്പെടുത്തിയെന്ന് യുവതി മൊഴി നൽകുകയായിരുന്നു.
Discussion about this post