കാലിഫോർണിയ: വൈഫൈ സൗകര്യങ്ങൾ ഇന്ന് അത്യന്താപേക്ഷികമായ ഒന്നാണ്. ഹോട്ടലുകളിലും റെയിൽവേ സ്റ്റേഷനുകളിലും കഫേകളിലുമെല്ലാം ഇന്ന് സൗജന്യ വൈഫൈ എന്ന ബോർഡുകൾ തൂങ്ങിക്കിടക്കുന്നത് കാണാൻ സാധിക്കും. എന്നാൽ, ഗൂഗിൾ പോലെ ഒരു വമ്പൻ ടെക് കമ്പനിയിൽ ഒരു വൈഫൈ പ്രശ്നമുണ്ടായാലോ? അത്തരത്തിൽ ഒരു പ്രശ്നത്തിലൂടെയാണ് കലിഫോർണിയയിലെ മൗണ്ടൻ വ്യൂ ഗൂഗിളിന്റെ ഓഫീസ് കടന്നുപോകുന്നത്.
ഏതാനും മാസങ്ങളായി തങ്ങൾക്ക് ഓഫീസിൽ വൈഫൈ ലഭിക്കുന്നില്ലെന്നാണ് ജീവനക്കാരുടെ പരാതി. ഓഫീസിൽ വൈഫൈ ലഭിക്കുന്നില്ലെങ്കിൽ നല്ല സിഗ്നൽ കിട്ടുന്ന തൊട്ടടുത്തുള്ള കഫേകളിൽ ഇരുന്ന് ജോലി ചെയ്യാനാണ് മാനേജർമാർ നിർദ്ദേശിച്ചിരിക്കുന്നത്. ഗുഗിളിന്റെ സ്വന്തം എഐ പ്ലാറ്റ്ഫോമായ ജെമിനിയും പ്രശ്നം സ്ഥിരീകരിച്ചിട്ടുണ്ട്.
താത്കാലിക പരിഹാരം എന്നവണ്ണം മികച്ച വൈഫൈ ചിപ്പുകളുള്ള പുതിയ ലാപ്ടോപ്പുകളും ജീവനക്കാർക്ക് നൽകുന്നുണ്ടെന്നും ചില മാധ്യമങ്ങൾ റിപ്പോർട്ട് ചെയ്യുന്നു. അതേസമയം, യഥാർത്ഥ പ്രശ്നമെന്താണെന്നോ അത് പരിഹരിക്കാൻ സാധിച്ചതോവായി ഗൂഗിൾ വ്യക്തമാക്കുന്നില്ലെന്നതും ശ്രദ്ധേയമായ കാര്യമാണ്.
കാലിഫോർണിയയിലെ മൗണ്ടൻ വ്യൂ ആസ്ഥാനത്തുള്ള ബേ വ്യൂ കെട്ടിടത്തിലാണ് ഈ പ്രശ്നങ്ങളുള്ളത്. കഴിഞ്ഞ വർഷം ജൂൺ മാസത്തിലാണ് വർക് ഫ്രം ഹോം ആയിരുന്ന ജീവനക്കാരോട് ഓഫീസിലേക്ക് മടങ്ങിയെത്തണമെന്ന് നിർദ്ദേശിച്ചിരിക്കുന്നത്. ആഴ്ചയിൽ മൂന്ന് ദിവസമെങ്കിലും ഓഫീസിൽ എത്തണമെന്നാണ് നിർദ്ദേശം നൽകിയിട്ടുള്ളത്. ഈ ഹാജർ നില തങ്ങളുടെ ജോലിക്കാരുടെ പെർഫോമൻസ് റിവ്യൂവിനേയും ബാധിക്കുമെന്നും മുന്നറിയിപ്പ് നൽകിയിട്ടുണ്ട്. ഇതിനിടെയുണ്ടായിരിക്കുന്ന ഇന്റർനെറ്റ് പ്രതിസന്ധി ജീവനക്കാരെ തൃശങ്കുവിലാക്കിയിരിക്കുകയാണ്.
അടുത്തിടെയാണ് ഗുഗിൾ തങ്ങളുടെ അഭിമാന ഓഫീസ് സമുച്ചയമായ ബേ വ്യൂ തുറന്നത്. ഈ കെട്ടിടവും ചുറ്റുമുള്ള ക്യാംപസും ഗൂഗിൾ തന്നെയാണ് രൂപകൽപന ചെയ്തിട്ടുള്ളത്. ഈ ഓഫീസ് കെട്ടിടത്തിന്റെ സൗകര്യങ്ങളേക്കുറിച്ചും മറ്റുമുള്ള വാർത്തകൾ നേരത്തെ തന്നെ ശ്രദ്ധപിടിച്ചുപറ്റിയിരുന്നു. തിരമാലകൾക്ക് സമാനമായി 6,00,000 ചതുരശ്ര അടിയിലാണ് ഈ ഓഫീസിന്റെ മേൽക്കൂര നിർമിച്ചിട്ടുള്ളത്. ഈ ഡിസൈൻ തന്നെയാണ് വൈഫൈക്ക് വില്ലനായിരിക്കുന്നതെന്ന വാദവും ഉയരുന്നുണ്ട്.
