വാഷിംഗ്ടൺ: ഡൽഹി മുഖ്യമന്ത്രി അരവിന്ദ് കെജ്രിവാളിൻ്റെ അറസ്റ്റിനെക്കുറിച്ചുള്ള യുഎസ് പ്രസ്ഥാവനയ്ക്കെ് പിന്നാലെ കോൺഗ്രസ് പാർട്ടിയുടെ അക്കൗണ്ടുകൾ മരവിപ്പിച്ച സംഭവത്തിലും യുഎസ് ഇടപെടൽ. ഇന്ത്യയുടെ ആഭ്യന്തര വിഷയത്തിൽ മറ്റ് രാജ്യങ്ങൾ ഇടപെടുന്നതിനെതിരെ ഇന്ത്യ രംഗത്തുവന്നതിന് പിന്നാലെയാണ് വീണ്ടും യുഎസ് പ്രസ്ഥാവന.
“ഈ ഓരോ പ്രശ്നങ്ങൾക്കും ന്യായവും സുതാര്യവും സമയബന്ധിതമായ നിയമ നടപടികളും ഞങ്ങൾ പ്രോത്സാഹിപ്പിക്കുന്നു.” എന്നാണ് യുഎസ് സ്റ്റേറ്റ് ഡിപ്പാർട്ട്മെൻ്റ് വക്താവ് മാത്യു മില്ലർ പറഞ്ഞത്. യുഎസ് നയതന്ത്രജ്ഞനെ ഇന്ത്യ വിളിച്ചുവരുത്തിയതിനെക്കുറിച്ച് ചോദിച്ചപ്പോൾ, സ്വകാര്യ നയതന്ത്ര സംഭാഷണങ്ങളെക്കുറിച്ച് അഭിപ്രായവും പറയാൻ മില്ലർ വിസമ്മതിച്ചു.
“ഞാൻ ഒരു സ്വകാര്യ നയതന്ത്ര സംഭാഷണങ്ങളെ കുറിച്ചും സംസാരിക്കാൻ പോകുന്നില്ല, പക്ഷേ ഇവിടെ പരസ്യമായി പറഞ്ഞത്, ന്യായവും സുതാര്യവും സമയബന്ധിതവുമായ നിയമനടപടികളെ മാത്രമേ ഞങ്ങൾ പ്രോത്സാഹിപ്പിക്കൂ.” മില്ലർ വ്യക്തമാക്കി.
കെജ്രിവാളിൻ്റെ അറസ്റ്റിനെ കുറിച്ച് വാഷിംഗ്ടണിൻ്റെ “സൂക്ഷ്മമായി നിരീക്ഷിക്കുന്ന” പരാമർശത്തിനെതിരെ ഇന്ത്യ നേരത്തെ ശക്തമായ പ്രതിഷേധം രേഖപ്പെടുത്തിയിരുന്നു. വിദേശകാര്യ മന്ത്രാലയം (എംഇഎ) ഉദ്യോഗസ്ഥർ ആക്ടിംഗ് ഡെപ്യൂട്ടി ചീഫ് ഓഫ് മിഷൻ ഗ്ലോറിയ ബെർബെനയെ ഡൽഹിയിലെ സൗത്ത് ബ്ലോക്കിലുള്ള ഓഫീസിലേക്ക് വിളിച്ചുവരുത്തുകയും ഈ കൂടിക്കാഴ്ച 30 മിനിറ്റിലധികം നീണ്ടുനിൽക്കുകയും ചെയ്തു.
