ചെന്നൈ: പതിവ് തെറ്റിക്കാതെ കെ പദ്മരാജന് തെരഞ്ഞെടുപ്പില് മത്സരക്കും. തെരഞ്ഞെടുപ്പില് മത്സരിച്ച് 238 തവണ പരാജയപ്പെട്ടിട്ടും ഇത്തവണയും മത്സരരംഗത്തുണ്ടാവുമെന്ന് അറിയിച്ചിരിക്കുകയാണ് പദ്മരാജന്. തമിഴ്നാട് മേട്ടൂര് സ്വദേശിയായ പദ്മരാജന് ‘ഇലക്ഷൻ കിങ്’ എന്നാണ് സ്വയം വിശേഷിപ്പിക്കുന്നത്. 1988 മുതലാണ് തെരഞ്ഞെടുപ്പില് പോരാട്ടം തുടങ്ങിയത്. ടയര് റിപ്പയര് ഷോപ്പ് ഉടമയായ ഈ 65കാരനെ നോക്കി തുടക്കത്തില് പലരും പരിഹസിച്ചിരുന്നു. എന്നാല് സാധാരണക്കാരനും തെരഞ്ഞെടുപ്പിന്റെ ഭാഗഭാക്കാവാന് കഴിയുമെന്ന് തെളിയിക്കാനാണ് താന് ശ്രമിക്കുന്നതെന്നായിരുന്നു പദ്മരാജന്റെ പ്രതികരണം. തമിഴ്നാട്ടിലെ ധര്മപുരിയില് നിന്നാണ് ഇത്തവണ മത്സരിക്കുന്നത്.
ഏറ്റവുമധികം തെരഞ്ഞെടുപ്പുകളിൽ മത്സരിച്ചയാൾ, ഏറ്റവുമധികം തെരഞ്ഞെടുപ്പുകളിൽ തോറ്റയാൾ എന്നിങ്ങനെ ഗിന്നസ്, ലിംക ബുക്ക് ഓഫ് റെക്കോർഡ്സുകൾ പദ്മരാജൻ സ്വന്തമാക്കിയിട്ടുണ്ട്. തമിഴ്നാട് സേലം ജില്ലയിലെ മേട്ടൂർ സ്വദേശിയായ പദ്മരാജന് 64 വയസുണ്ട്. ഹോമിയോ ബിരുദധാരിയായ പദ്മരാജൻ്റെ ജീവിതമാർഗം പഞ്ചറൊട്ടിക്കൽ കടയാണ്. ജനശ്രദ്ധയാകർഷിക്കുന്ന തെരഞ്ഞെടുപ്പ് നടക്കുന്ന ഇടങ്ങളിൽ മത്സരിക്കാൻ എത്തുന്നത് പദ്മരാജൻ്റെ പതിവാണ്. തെരഞ്ഞെടുപ്പില് എല്ലാവരും ജയിക്കാനാണ് മത്സരിക്കുന്നത്. എന്നാല് പദ്മരാജന് തെരഞ്ഞെടുപ്പില് പങ്കെടുക്കുക എന്നതാണ് പ്രധാനം. തോല്വിയെ സന്തോഷത്തോടെ സ്വീകരിക്കുന്ന ഒരു സ്ഥാനാര്ഥി കൂടിയാണ് പദ്മരാജന്.
പ്രധാനമന്ത്രി നരേന്ദ്രമോദി, മുന് പ്രധാനമന്ത്രിമാരായ അടല് ബിഹാരി വാജ്പേയ്, മന്മോഹന് സിങ്, രാഹുല് ഗാന്ധി തുടങ്ങി പ്രമുഖര്ക്കെതിരെയെല്ലാം അദ്ദേഹം മത്സരിച്ചിട്ടുണ്ട്. ആരാണ് എതിര് സ്ഥാനാര്ഥി എന്ന് നോക്കാറില്ല. തെരഞ്ഞെടുപ്പില് മത്സരിക്കുക എന്നതാണ് പ്രധാനമെന്നും പദ്മരാജന് പറയുന്നു. മൂന്ന് പതിറ്റാണ്ടായി തെരഞ്ഞെടുപ്പ് രംഗത്തുള്ള പദ്മരാജന് ലക്ഷങ്ങള് ഇതിനോകം തന്നെ ചെലവഴിച്ചു കഴിഞ്ഞു. 2011 തെരഞ്ഞെടുപ്പിലാണ് ഇദ്ദേഹത്തിന്റെ ഏറ്റവും നല്ല പ്രകടനം. അന്ന് 6273 വോട്ടാണ് പദ്മരാജന് പിടിച്ചത്.
