ബംഗളൂരു: കഴിഞ്ഞ ദിവസം ബംഗളൂരു രാമേശ്വരം കഫേ സ്‌ഫോടനക്കേസുമായി ബന്ധപ്പെട്ട പ്രതിയെ എൻഐഎ ഉദ്യോഗസ്ഥർ അറസ്റ്റ് ചെയ്തിരുന്നു. മുഖ്യപ്രതി മുസമ്മിൽ ഷെരീഫിനെയാണ് അധികൃതർ അറസ്റ്റ് ചെയ്തത്. ഇപ്പോഴിതാ സുപ്രധാനമായ രണ്ട് പ്രതികളുടെ വിവരങ്ങൾ കൂടി കണ്ടെത്തിയിരിക്കുകയാണ് എൻഐഎ.
പ്രതികളായ അബ്ദുൾ മതീൻ അഹമ്മദ് താഹ, മുസാവിർ ഹുസൈൻ ഷാജിബ് എന്നിവരുടെ ഫോട്ടോ എൻഐഎ പുറത്തുവിട്ടു. പ്രതികളെക്കുറിച്ച് വിവരം നൽകുന്നവർക്ക് എൻഐഎ 10 ലക്ഷം രൂപ പാരിതോഷികവും പ്രഖ്യാപിച്ചു. സംഭവത്തിൽ ഉൾപ്പെട്ട മറ്റ് പ്രതികൾക്ക് ഷെരീഫ് ലോജിസ്റ്റിക് പിന്തുണ നൽകിയതായി എൻഐഎ പറഞ്ഞിരുന്നു.
കഫേയില്‍ ഐഇഡി പതിപ്പിച്ചത് മുസാവിര്‍ ഹുസൈന്‍ ഷാസിബാണെന്നും ഗൂഢാലോചനയില്‍ പങ്കെടുത്തയാളാണ് അബ്ദുള്‍ മത്തീന്‍ താഹ എന്നും എന്‍ഐഎ പറഞ്ഞു. ഇരുവരെയും 2020ലെ തീവ്രവാദക്കേസില്‍ ഇതിനകം തിരയുന്നുണ്ട്.
കർണാടകയിലെ 12, തമിഴ്‌നാട്ടിലെ 5, ഉത്തർപ്രദേശിലെ ഒന്ന് എന്നിങ്ങനെ 18 സ്ഥലങ്ങളിൽ എൻഐഎ സംഘങ്ങൾ നടത്തിയ ഓപ്പറേഷനുകൾക്കൊടുവിലാണ് മുസമ്മിൽ ഷെരീഫ് എന്നയാളെ കൂട്ടുപ്രതിയെന്ന നിലയിൽ കസ്റ്റഡിയിലെടുത്തത്.
Discussion about this post