ഡല്ഹി: മുഖ്യമന്ത്രി അർവിന്ദ് കെജ്രിവാളിന്റെ ഭാര്യ സുനിത കെജ്രിവാൾ മുഖ്യമന്ത്രിയാകാനുള്ള ശ്രമങ്ങളിലെന്ന് കേന്ദ്രമന്ത്രിയും മുതിർന്ന ബിജെപി നേതാവുമായ ഹർദീപ് സിങ് പുരി. ലാലു പ്രസാദ് യാദവ് ജയിലിലായപ്പോൾ മുഖ്യമന്ത്രിപദത്തിലേക്കെത്തിയ ഭാര്യ റാബ്രി ദേവിയോട് സുനിത കെജ്രിവാളിനെ ഉപമിക്കുകയും ചെയ്തു മന്ത്രി. “മാഡം ഇപ്പോൾ റാബ്രി ദേവിയെപ്പോലെ മുഖ്യമന്ത്രിയാകാനുള്ള തയ്യാറെടുപ്പിലായിരിക്കും,” അദ്ദേഹം പറഞ്ഞു.
അതെസമയം ജയിലിലുള്ള അർവിന്ദ് കെജ്രിവാളിനു വേണ്ടി പ്രചാരണ പരിപാടികൾ ശക്തമാക്കിയിരിക്കുകയാണ് സുനിത കെജ്രിവാൾ. ഇതിന്റെ ഭാഗമായി ഇന്ന് അവർ ഒരു വാട്സാപ്പ് പ്രചാരണത്തിന് തുടക്കമിട്ടിട്ടുണ്ട്. കെജ്രിവാളിന് 8297324624 എന്ന നമ്പരിൽ ഐക്യദാർഢ്യ സന്ദേശങ്ങൾ അയയ്ക്കാൻ സുനിത സോഷ്യൽ മീഡിയയിലൂടെ ആവശ്യപ്പെട്ടു. ‘കെജ്രിവാൾ കോ ആശിർവാദ്’ എന്നാണ് പ്രചാരണപരിപാടിയുടെ പേര്. കെജ്രിവാൾ എൻഫോഴ്സ്മെന്റ് ഡയറക്ടറേറ്റിന്റെ അറസ്റ്റിലായതിനു ശേഷം സുനിത കെജ്രിവാൾ ശക്തമായി രംഗത്തിറങ്ങിയിരിക്കുകയാണ്.
