കൊല്ക്കത്ത: പശ്ചിമബംഗാള് സ്കൂള് സര്വീസസ് കമ്മിഷന് നിയമന കുംഭകോണത്തില് മമത സര്ക്കാരിന് കനത്ത തിരിച്ചടി. പശ്ചിമ ബംഗാളിലെ സര്ക്കാര്, എയ്ഡസ് സ്കൂളുകളിലെ വിവാദമായ അധ്യാപക നിയമനം ഹൈക്കോടതി റദ്ദാക്കി. പുതിയ നിയമന നടപടികള് തുടങ്ങാന് സ്കൂള് സര്വീസ് കമ്മിഷനോട് ജസ്റ്റിസ് ദേബാങ്സു ബസക്കിന്റെ നേതൃത്വത്തിലുള്ള ബെഞ്ച് നിര്ദേശിച്ചു. നിയമന ക്രമക്കേസില് തുടര് അന്വേഷണം നടത്തി, മൂന്നു മാസത്തിനകം റിപ്പോര്ട്ട് നല്കാന് സിബിഐയോടും ഹൈക്കോടതി നിര്ദേശിച്ചിട്ടുണ്ട്. ആഹ്ലാദത്തോടെയാണ് കോടതി ഉത്തരവിനോട് ഉദ്യോഗാര്ഥികള് പ്രതികരിച്ചത്. വര്ഷങ്ങളോളം തെരുവില് നടത്തിയ പോരാട്ടം ഫലം കണ്ടതായി അവര് പറഞ്ഞു.
2016-ല് നടന്ന നിയമന പരീക്ഷയില് 23 ലക്ഷം പേരാണ് 24,640 തസ്തികകളിലേക്കായി പങ്കെടുത്തത്. ഇതില് 25,753 പേര്ക്ക് നിയമന ഉത്തരവ് ലഭിച്ചുവെന്ന് പരാതിക്കാരുടെ അഭിഭാഷകനായ ഫിര്ദൗസ് ഷമീം കോടതിയില് ചൂണ്ടിക്കാട്ടി. വ്യാപകമായി ക്രമക്കേട് റിപ്പോര്ട്ട് ചെയ്യപ്പെട്ടതോടെ നിയമനം കോടതിയിലെത്തുകയായിരുന്നു. തുടര്ന്ന് സിബിഐ അന്വേഷണത്തിനു ഹൈക്കോടതി നേരത്തെ ഉത്തരവിട്ടിരുന്നു.
സിബിഐ അന്വേഷണ ഉത്തരവിനെതിരെ മമത സര്ക്കാര് സുപ്രീം കോടതിയെ സമീപിച്ചെങ്കിലും ഉത്തരവ് അനുകൂലമായില്ല. അന്വേഷണത്തിനു പച്ചക്കൊടി നല്കിയ സുപ്രീം കോടതി, ഇതുവരെ നടത്തിയ നിയമനങ്ങള്ക്കു താത്കാലിക പരിരക്ഷ നല്കിയിരുന്നു. പുതിയ ബെഞ്ച് രൂപീകരിച്ച് ആറു മാസത്തിനകം തീര്പ്പുണ്ടാക്കാന് ഹൈക്കോടതിക്കു സുപ്രീം കോടതി നിര്ദേശം നല്കി. തുടര്ന്നു വാദം കേട്ട ഡിവിഷന് ബെഞ്ച് മാര്ച്ച് 20ന് ഹര്ജികള് വിധി പറയാന് മാറ്റുകയായിരുന്നു. നിയമന ക്രമക്കേടുമായി ബന്ധപ്പെട്ട് മുന് വിദ്യാഭ്യാസ മന്ത്രി പാര്ഥ ചാറ്റര്ജിയെ സിബിഐ അറസ്റ്റ് ചെയ്തിട്ടുണ്ട്.
