കൊച്ചി: വേനല് കടുത്തതോടെ ഇടുക്കി അണക്കെട്ടിലെ ജലനിരപ്പ് ക്രമാതീതമായി താഴുന്നു. അണക്കെട്ടിലെ ജലനിരപ്പ് 2337 അടിയായി. സംഭരണ ശേഷിയുടെ 35 ശതമാനം വെള്ളം മാത്രമാണ് അണക്കെട്ടിലുള്ളത്. ജലനിരപ്പ് 2280 അടിയില് താഴെ എത്തിയാല് മൂലമറ്റത്തേക്ക് വെള്ളമെത്തിക്കാന് കഴിയാതെ വരും. മറ്റ് ഡാമുകളിലും ജലനിരപ്പ് ഗണ്യമായി കുറയുകയാണ്.
ഇടുക്കി അണക്കെട്ടിലെ ജലനിരപ്പ് കുറയുന്നത് കെ.എസ്.ഇ.ബിക്ക് കടുത്ത വെല്ലുവിളിയാണ് ഉയർത്തുന്നത്. കഴിഞ്ഞ വര്ഷം ഇതേസമയം ജലനിരപ്പ് 2330 അടിയായിരുന്നു. എന്നാല് ഉയര്ന്ന തോതിൽ വൈദ്യുതി ഉത്പാദിപ്പിച്ചിരുന്നു. ഇത്തവണ മുന്കരുതല് നടപടിയുടെ ഭാഗമായി വൈദ്യുതോത്പാദനം കുറച്ചിരുന്നു. എന്നിട്ടും ജലനിരപ്പ് 2337 അടിയായി കുറഞ്ഞു.
2280 അടിയില് താഴെ ജലനിരപ്പ് എത്തിയാല് പെന്സ്റ്റോക്ക് പൈപ്പു വഴി മൂലമറ്റത്തേക്ക് വെള്ളമെത്തിക്കാന് കഴിയാതെ സ്ഥിതിയാവും. ഇത് ഒഴിവാക്കാനാണ് കെഎസ്ഇബി ശ്രമിക്കുന്നത്. നിലവില് മൂലമറ്റത്തെ ആറു ജനറേറ്ററുകളില് അഞ്ചെണ്ണം മാത്രമാണ് പ്രവര്ത്തിക്കുന്നത്. ഉത്പാദനശേഷം 45.349 ഘനമീറ്റര് വെള്ളം ഒഴുകിപ്പോകുന്നുണ്ട്. വൈദ്യുതി ഉപഭോഗം കൂടിയ സാഹചര്യത്തില് ലോഡ് ഷെഡ്ഡിങ് ഏര്പ്പെടുത്തണമെന്നാണ് കെഎസ്ഇബി സര്ക്കാരിനോട് ആവശ്യപ്പെട്ടിട്ടുള്ളത്.
