ന്യൂഡല്‍ഹി: കേന്ദ്രത്തില്‍ കോണ്‍ഗ്രസ് സര്‍ക്കാര്‍ അധികാരത്തില്‍ എത്തിയാല്‍ സ്ത്രീകളുടെ അക്കൗണ്ടില്‍ ഓരോ ലക്ഷം രൂപ വീതം നിക്ഷേപിക്കുമെന്ന് കോണ്‍ഗ്രസ് നേതാവ്. ഒരാള്‍ക്ക് രണ്ടു ഭാര്യമാരുണ്ടെങ്കില്‍ രണ്ടുലക്ഷം രൂപ ലഭിക്കുമെന്നും അദ്ദേഹം കൂട്ടിച്ചേര്‍ത്തു. മധ്യപ്രദേശിലെ രത്‌ലം മണ്ഡലത്തിലെ കോണ്‍ഗ്രസ് സ്ഥാനാര്‍ത്ഥി കാന്തിലാല്‍ ഭൂരിയയുടേതാണ് വാഗ്ദാനം. സെയ് ലാനയില്‍ കോണ്‍ഗ്രസിന്റെ റാലിയിൽ സംസാരിക്കുകയായിരുന്നു അദ്ദേഹം.
കോണ്‍ഗ്രസിന്റെ പ്രകടനപത്രികയില്‍ പറയുന്ന പ്രകാരം രാജ്യത്തെ എല്ലാ വീട്ടിലെ സ്ത്രീകളുടേയും അക്കൗണ്ടില്‍ ഒരു ലക്ഷം രൂപ നിക്ഷേപിക്കുമെന്നാണ് ഭൂരിയ പറഞ്ഞത്. മധ്യപ്രദേശ് മുന്‍ മുഖ്യമന്ത്രി ദിഗ് വിജയ് സിങ്, കോണ്‍ഗ്രസ് സംസ്ഥാന അധ്യക്ഷന്‍ ജിത്തു പടാനി തുടങ്ങിയവരും വേദിയിലുണ്ടായിരുന്നു
അഞ്ചു തവണ പാര്‍ലമെന്റെ അംഗമായ നേതാവാണ് കാന്തിലാല്‍ ഭൂരിയ. രണ്ടാം യുപിഎ സര്‍ക്കാരില്‍ മന്ത്രിയുമായിരുന്നു. അതേസമയം കാന്തിലാല്‍ ഭൂരിയയുടെ പ്രസ്താവനയ്‌ക്കെതിരെ ബിജെപി രംഗത്തെത്തി. കോണ്‍ഗ്രസ് നേതാവിനെതിരെ തിരഞ്ഞെടുപ്പ് കമ്മീഷന്‍ നടപടിയെടുക്കണമെന്ന് ബിജെപി നേതാവ് മായാ നരോലിയ ആവശ്യപ്പെട്ടു.
Discussion about this post