ബാംഗ്ലൂർ: ലൈംഗിക പീഡനക്കേസ് പ്രതിയായ ജനതാദൾ എംപി പ്രജ്വല് രേവണ്ണ അറസ്റ്റിൽ. രേവണ്ണയെ പ്രത്യേക അന്വേഷണ സംഘം വിമാനത്താവളത്തിലെത്തിയാണ് കസ്റ്റഡിയിലെടുത്തത്. ജര്മനിയിലെ മ്യൂണിക്കില്നിന്ന് ബാംഗ്ലൂരുവിലെത്തിയതിന് പിന്നാലെയാണ് അറസ്റ്റ്.
ഇന്ന് പുലര്ച്ചെ ലുഫ്താൻസ വിമാനത്തിലാണ് പ്രജ്വൽ ബെംഗളൂരു വിമാനത്താവളത്തിലെത്തിയത്. പിന്നാലെ പ്രജ്വലിനെ എമിഗ്രേഷൻ പോയന്റിൽ സിഐഎസ്എഫ് തടഞ്ഞു. തുടർന്ന് പ്രത്യേക അന്വേഷണ സംഘം കസ്റ്റഡിയിലെടുക്കുകയായിരുന്നു. ശേഷം സിഐഡി ഓഫീസിലേക്ക് കൊണ്ടുപോയി.മെഡിക്കല് പരിശോധനകളടക്കം പൂര്ത്തിയാക്കിയതിന് ശേഷമായിരിക്കും കോടതിയില് ഹാജരാക്കുക.
നേരത്തേ പൊലീസ് ബ്ലൂ കോര്ണര് നോട്ടീസ് ഉള്പ്പെടെ പുറപ്പെടുവിച്ചിരുന്നു. കോടതിയുടെ വാറന്റും നിലവിലുണ്ട്. അതിനാല് പ്രജ്വല് രേവണ്ണ വിമാനത്താവളത്തില് ഇറങ്ങിയാലുടന് തന്നെ അറസ്റ്റിലാകുമെന്ന് റിപ്പോർട്ടുകളുണ്ടായിരുന്നു. ഇതിനായി പ്രത്യേക ക്രമീകരണങ്ങളും അന്വേഷണസംഘം ഒരുക്കിയിരുന്നു.
