രാഹുലിന് പ്രധാനമന്ത്രി മറുപടി പറഞ്ഞിട്ടില്ല, പ്രതികരിച്ചത് ഹിന്ദു വിരുദ്ധ പരാമർശത്തിൽ; മാധ്യമങ്ങൾ തെറ്റിദ്ധരിപ്പിക്കരുത്; വി മുരളീധരൻ

തിരുവനന്തപുരം: രാഹുൽ ഗാന്ധിയുടെ വിവാദ പരാമർശത്തിൽ മാധ്യമങ്ങൾ ജനങ്ങളെ തെറ്റിദ്ധരിപ്പിക്കുകയാണെന്ന് ബിജെപി നേതാവ് വി മുരളീധരൻ. ലോക്സഭയിൽ രാഹുൽ ഗാന്ധിക്ക് പ്രധാന മന്ത്രി മറുപടി പറഞ്ഞെന്ന മാധ്യമ വാർത്തകൾ തെറ്റാണ്. രാഹുലിന്റെ പ്രസംഗത്തിൽ പ്രധാന മന്ത്രി മറുപടി പറയാൻ ഇരിക്കുന്നതേയുള്ളുവെന്നും വി മുരളീധരൻ വ്യക്തമാക്കി.
സഭയിൽ തെറ്റായ കാര്യങ്ങൾ പറയുമ്പോൾ ചട്ടങ്ങൾ ഉദ്ധരിച്ച് അത് ചൂണ്ടിക്കാട്ടുകയാണ് പ്രധാന മന്ത്രി ചെയ്തത്. രാഹുൽ ഹിന്ദു വിരുദ്ധ പരാമർശം നടത്തിയപ്പോൾ, അതിനുള്ള പ്രതികരണം ആണ് ലോക്സഭയിൽ ഉണ്ടായത്. അത് രാഹുലിനുള്ള മറുപടിയല്ല . നൂറു കോടി വരുന്ന രാജ്യത്തെ ഹിന്ദുക്കൾക്ക് നാഥനുണ്ട് എന്ന് ഓർമ്മിപ്പിക്കുന്നതായിരുന്നു പ്രധാന മന്ത്രിയുടെ പ്രതികരണം എന്നും വി മുരളീധരൻ ചൂണ്ടിക്കാട്ടി

രാഹുൽ ഗാന്ധിയുടെ പ്രസംഗം കേട്ട് മനസ്സിലാക്കി വേണം മാധ്യമ പ്രവർത്തകർ ചോദ്യങ്ങൾ ചോദിക്കാൻ എന്നും, ഏ കെ ജി സെന്ററിൽ നിന്നും ലഭിക്കുന്ന കാപ്സ്യുളുകൾ പ്രകാരം അല്ല ചോദ്യങ്ങൾ ചോദിക്കേണ്ടതെന്നും മുരളീധരൻ പരിഹസിച്ചു