കേന്ദ്ര ബജറ്റ്; യുവാക്കൾക്കായി വമ്പൻ പ്രഖ്യാപനം – ആദ്യമായി ജോലിയിൽ പ്രവേശിക്കുന്നവർക്ക് ഒരു മാസത്തെ ശമ്പളം നൽകും

മൂന്നാം മോദി സർക്കാരിന്റെ ആദ്യ ബജറ്റ് പാർലമെന്റിൽ അവതരിപ്പിച്ച് ധനമന്ത്രി നിർമ്മല സീതാരാമൻ. യുവാക്കൾക്കായി വമ്പൻ പ്രഖ്യാപനങ്ങളാണ് ഈ ബജറ്റിൽ ഉൾപ്പെടുത്തിയിരിക്കുന്നത്. പ്രധാനമന്ത്രിയുടെ പദ്ധതിക്ക് കീഴിൽ മൂന്ന് പ്രോത്സാഹന പദ്ധതികൾ സർക്കാർ കൊണ്ടുവരുമെന്ന് ബജറ്റ് പ്രസംഗത്തിൽ ധനമന്ത്രി പറഞ്ഞു. 20ലക്ഷം യുവാക്കളെ വിദഗ്ധ തൊഴിലാളികളാക്കി മാറ്റും. പുതിയ തൊഴിലുടമകൾക്കായി നാലുവർഷത്തെ പി.എഫ് സഹായപദ്ധതിയും ധനമന്ത്രി പ്രഖ്യാപിച്ചു.

ആദ്യമായി ജോലിക്ക് കയറുന്നവർക്ക് ഇപിഎഫ് എൻറോൾമെൻ്റ് പിന്തുണ പ്രഖ്യാപിച്ചു. ഫോർമൽ സെക്ടറിൽ ജോലിക്ക് പ്രവേശിക്കുന്ന പുതിയ തൊഴിലാളികൾക്ക് ഒരു മാസത്തെ ശമ്പളം പദ്ധതി വഴി ഇൻസെന്റീവായി ലഭിക്കും. ഡയറക്ട് ബെനിഫിറ്റ് ട്രാൻസ്ഫർ വഴി 15,000 രൂപ വരെ മൂന്ന് തവണകളായി നൽകും. ആദ്യമായി ജോലിയിൽ പ്രവേശിക്കുന്നവർക്ക്, ശമ്പളം ഒരു ലക്ഷം രൂപയിൽ താഴെയാണെങ്കിൽ ഈ ആനുകൂല്യം ലഭിക്കും. ഇത് 2.1 ലക്ഷം യുവാക്കൾക്ക് ഇതിന്റെ പ്രയോജനം ലഭിക്കുമെന്നാണ് വിലയിരുത്തൽ.

ഈ സ്കീമുകൾ ഇപിഎഫ്ഓയിൽ എൻറോൾമെന്റിനെ അടിസ്ഥാനമാക്കിയുള്ളതായിരിക്കും. പ്രധാനമന്ത്രി പാക്കേജ് നിന്നുള്ള ഫണ്ട് ഉപയോഗിച്ചണ് പദ്ധതികൾ നടപ്പിലാക്കുക. മറ്റൊരു പദ്ധതി നിർമാണ മേഖലയിൽ തൊഴിലവസരങ്ങൾ സൃഷ്ടിക്കുന്നതിനാണ്. പുതിയ തൊഴിലാളികൾക്കും തൊഴിലുടമയ്ക്കും പദ്ധതി വഴി ഇൻസെൻറീവ് നൽകും. ജോലിയുടെ ആദ്യ നാല് വർഷത്തെ ഇപിഎഫ്ഒ സംഭാവനകളെ പരിഗണിച്ചാണ് ആനുകൂല്യം. തൊഴിലുടമകളുടെ ഇപിഎഫ് സംഭവാന മാസത്തിൽ 3,000 രൂപ വരെ റീഇംബേഴസ് ചെയ്യും. 2 വർഷത്തേക്കാണ് ഇത് ലഭിക്കുക. ഇത് 30 ലക്ഷം യുവാക്കൾക്ക് പ്രയോജനം ചെയ്യും. കൂടാതെ എല്ലാ മേഖലകളിലും അധിക തൊഴിലവസരങ്ങൾ ലഭ്യമാക്കും.

50 ലക്ഷം പേർക്ക് അധിക തൊഴിലവസരങ്ങൾ നൽകാനാണ് ഈ സംരംഭം ലക്ഷ്യമിടുന്നത്. കൂടാതെ വിദ്യാഭ്യാസത്തിനും തൊഴിൽ നൈപുണ്യത്തിനുമായി 1.48 ലക്ഷം കോടി ധനമന്ത്രി പ്രഖ്യാപിച്ചു. ഇടക്കാല ബജറ്റിൽ പ്രഖ്യാപിച്ച വിവിധ പദ്ധതികൾ പുരോഗമിക്കുകയാണെന്നും ധനമന്ത്രി വ്യക്തമാക്കി.