ഡോക്ടറുടെ കൊലപാതകം: ബലാത്സംഗം ചെയ്യുന്നതിന് മുമ്പ് പ്രതി അക്രമാസക്തമായ അശ്ലീല വിഡിയോ കണ്ടതായി റിപ്പോർട്ട്

കൊൽക്കത്തയിലെ ആശുപത്രിയിൽ പോസ്റ്റ് ഗ്രാജ്വേറ്റ് ട്രെയിനി ഡോക്ടറെ ബലാത്സംഗം ചെയ്ത് കൊലപ്പെടുത്തിയ കേസിലെ പ്രതിയെ കുറിച്ചുള്ള കൂടുതൽ വിവരങ്ങളാണ് പുറത്തു വരുന്നത്. കുറ്റകൃത്യം നടക്കുന്നതിന് മുമ്പ് പ്രതി സഞ്ജയ് റോയ് മദ്യം കഴിച്ചിരുന്നതായി പ്രാഥമിക അന്വേഷണത്തിൽ വ്യക്തമായതായി പോലീസ് വൃത്തങ്ങൾ ഇന്ത്യ ടുഡേ ടിവിയോട് പറഞ്ഞു.

കുറ്റകൃത്യം നടന്ന ദിവസം രാത്രി 11 മണിയോടെ സഞ്ജയ് ആശുപത്രിക്ക് പിന്നിലെ ഒരു സ്ഥലത്തേക്ക് മദ്യപിക്കാനായി പോയിരുന്നു. അവിടെ വെച്ച് മദ്യപിക്കുമ്പോൾ ഇയാൾ അശ്ലീല വിഡിയോകൾ കണ്ടതായും വൃത്തങ്ങൾ പറഞ്ഞു.

പരിശോധനയ്ക്കിടെ, സഞ്ജയ് റോയിയുടെ മൊബൈൽ ഫോണിൽ നിന്ന് അക്രമാസക്തമായ നിരവധി അശ്ലീല വീഡിയോകൾ പോലീസ് കണ്ടെത്തി.

അന്നുരാത്രി പലതവണ റോയ് ആശുപത്രി വളപ്പിൽ കടന്നതായും പൊലീസ് വൃത്തങ്ങൾ അറിയിച്ചു.

സർക്കാർ നിയന്ത്രണത്തിലുള്ള ആർജി കാർ മെഡിക്കൽ കോളേജ് ആശുപത്രിക്കുള്ളിൽ ബലാത്സംഗം ചെയ്ത് കൊലപ്പെടുത്തിയ 31 കാരിയായ വനിതാ ബിരുദാനന്തര ട്രെയിനി ഡോക്ടറുടെ മൃതദേഹം വെള്ളിയാഴ്ച രാവിലെയാണ് സെമിനാർ ഹാളിൽ നിന്നും കണ്ടെത്തിയത് .

പോസ്റ്റ്‌മോർട്ടം റിപ്പോർട്ടിൽ ഇരയുടെ സ്വകാര്യ ഭാഗങ്ങളിൽ നിന്നും രക്തം വരുന്നതായി കണ്ടത്തി. അവരുടെ വയറിലും ഇടതുകാലിലും കഴുത്തിലും വലതുകൈയിലും മോതിരവിരലിലും ചുണ്ടിലും പരിക്കുണ്ട്.

ആക്രമണം നടന്ന ചെസ്റ്റ് മെഡിസിൻ വിഭാഗത്തിന് രണ്ട് പ്രവേശന പോയിൻ്റുകളുണ്ട്. കുറ്റകൃത്യം നടന്ന രാത്രിയിൽ, ഈ പ്രവേശന കവാടങ്ങളിലൊന്ന് അടച്ചു, പിൻവാതിൽ തുറന്നു.

പുലർച്ചെ നാല് മണിയോടെ അഞ്ചോ ആറോ പേർ ഈ പിൻവാതിലിലൂടെ ഡിപ്പാർട്ട്‌മെൻ്റിലേക്ക് പ്രവേശിക്കുന്നത് സിസിടിവി ദൃശ്യങ്ങളിൽ പതിഞ്ഞതായി വൃത്തങ്ങൾ അറിയിച്ചു. റോയ് ഒഴികെ ബാക്കിയെല്ലാവരും ആശുപത്രിയിൽ പ്രവേശിപ്പിച്ച ബന്ധുക്കളെ പരിചരിക്കുന്നവരാരയിരുന്നുവെന്നും വൃത്തങ്ങൾ കൂട്ടിച്ചേർത്തു.

പക്ഷേ പ്രതിയായ റോയിക്ക് അന്നു രാത്രി ഡിപ്പാർട്ട്‌മെൻ്റിൽ ഉണ്ടായിരിക്കാൻ മതിയായ കാരണങ്ങളുണ്ടായിരുന്നില്ല. വികൃതമായ മനസിനുടമയായ ഇയാൾ അന്ന് കണ്ടിരുന്നത് സാധാരണ ആളുകൾ കാണുന്ന തരത്തിലുള്ള അശ്ലീല വിഡിയോകൾ അല്ലായിരുന്നുവെന്നും അന്വേഷണ സംഘം ചൂണ്ടിക്കാട്ടി.

കുറ്റം ചെയ്ത ശേഷം റോയ് തെളിവ് നശിപ്പിക്കാൻ ശ്രമിച്ചതായി കൂടുതൽ അന്വേഷണത്തിൽ കണ്ടെത്തി. സംഭവസ്ഥലത്ത് നിന്ന് രക്തക്കറ കഴുകിക്കളയാൻ ശ്രമിച്ചതായി പോലീസ് സൂചന ലഭിച്ചിട്ടുണ്ട്. പുലർച്ചെ 4:45 ഓടെ സെമിനാർ മുറിയിൽ നിന്ന് റോയ് ഇറങ്ങിപ്പോകുന്നതും സിസിടിവി ദൃശ്യങ്ങളിൽ കാണാം.

കുറ്റകൃത്യത്തിന് ശേഷം, റോയ് നാലാം ബറ്റാലിയൻ്റെ ബാരക്കിലേക്ക് പോയി അവിടെ കിടന്നുറങ്ങുകയായിരുന്നു. ഇതേ സ്ഥലത്തുവെച്ച് അറസ്റ്റ് ചെയ്ത ഇയാൾ അപ്പോഴും മദ്യലഹരിയിലായിരുന്നു.

ഓഗസ്റ്റ് 23 വരെ പോലീസ് കസ്റ്റഡിയിൽ വിട്ട റോയിക്കെതിരെ ബിഎൻഎസ് 64 (ബലാത്സംഗം), 103 (കൊലപാതകം) എന്നീ വകുപ്പുകൾ പ്രകാരമാണ് കേസെടുത്തിരിക്കുന്നത്.