കനത്ത മഴയിൽ വലഞ്ഞ് ഉത്തരേന്ത്യ. രാജസ്ഥാനിൽ പ്രളയ സമാനമായ സാഹചര്യമാണ് നിലനിൽക്കുന്നത്. കഴിഞ്ഞ കുറച്ച് ദിവസങ്ങളായി തുടരുന്ന മഴയിൽ നഗരത്തിൻ്റെ പല ഭാഗങ്ങളിലും ജലനിരപ്പ് 5 മുതൽ 6 അടി വരെ ഉയർന്നിട്ടുണ്ട്. ഇതോടെ ദുരന്തബാധിത പ്രദേശങ്ങളിൽ നിന്ന് മാറിത്താമസിക്കാൻ പോലും സാധിക്കാതെ വലയുകയാണ് സാധാരണജനം.
അതേസമയം, ഉത്തരേന്ത്യൻ സംസ്ഥാനങ്ങളിൽ ഏറ്റവും കൂടുതൽ നാശനഷ്ടമുണ്ടായത് രാജസ്ഥാനിലാണ്. രണ്ട് ദിവസങ്ങളിലായി സംസ്ഥാനത്ത് 16 മരണങ്ങൾ റിപ്പോർട്ട് ചെയ്തു – ശനിയാഴ്ച രണ്ട്, ഞായറാഴ്ച 14. കരൗലി ജില്ലയിൽ ഞായറാഴ്ച 38 സെൻ്റീമീറ്റർ “അസാധാരണമായ കനത്ത മഴ” രേഖപ്പെടുത്തി.
പ്രധാന മാർക്കറ്റും മുനിസിപ്പൽ കൗൺസിൽ ഓഫീസും ഉൾപ്പെടെ ഹിന്ദൗണിൻ്റെ പല ഭാഗങ്ങളും വെള്ളത്തിനടിയിലായതായി കരൗലി ജില്ലയിലെ ബാധിത പ്രദേശത്ത് നിന്ന് ഇന്ത്യ ടുഡേ റിപ്പോർട്ട് ചെയ്തു. ഹയർസെക്കൻഡറി സ്‌കൂളിനെയും വെള്ളംകയറി ബാധിച്ചിട്ടുണ്ട്.
സ്ഥിതിഗതികൾ വിലയിരുത്താനോ അഭിസംബോധന ചെയ്യാനോ രാഷ്ട്രീയ പ്രതിനിധികളോ ഭരണ പ്രതിനിധികളോ എത്തിയിട്ടില്ലെന്ന് പ്രദേശവാസികൾ നിരാശ പ്രകടിപ്പിച്ചു. വെള്ളപ്പൊക്കം, പ്രത്യേകിച്ച് താഴ്ന്ന പ്രദേശങ്ങളിൽ, പ്രായമായവരെയും കുട്ടികളെയും സാരമായി ബാധിച്ചു.
“ഒരു ആശ്വാസവും ഞങ്ങളിലേക്ക് എത്തിയിട്ടില്ല. കഴിഞ്ഞ മൂന്ന് ദിവസമായി പെയ്ത കനത്ത മഴയിൽ ഞങ്ങൾ കടുത്ത പ്രശ്‌നത്തിലാണ്,” ഹിന്ദൗണിലെ ഒരു നിവാസി ഇന്ത്യ ടുഡേയോട് പറഞ്ഞു.
തുടർച്ചയായി പെയ്യുന്ന മഴയിൽ വീടുകളും സാധനങ്ങളും നശിച്ചു. മഴവെള്ളം വീട്ടിൽ കയറിയതിനാൽ സാധനങ്ങൾ നഷ്ടപ്പെട്ടു, ഞങ്ങളെ സമീപിക്കാൻ ഭരണപക്ഷം ഒരു ശ്രമവും നടത്തിയിട്ടില്ലെന്ന് മറ്റൊരു താമസക്കാരൻ വിലപിച്ചു.
സംസ്ഥാനത്തിൻ്റെ പല ഭാഗങ്ങളിലും കനത്ത മഴ ലഭിക്കുമെന്ന് ജയ്പൂരിലെ പ്രാദേശിക കാലാവസ്ഥാ നിരീക്ഷണ കേന്ദ്രം ഞായറാഴ്ച നേരത്തെ സൂചിപ്പിച്ചിരുന്നു. കനത്ത വെള്ളക്കെട്ട് കാരണം ജയ്പൂരിലെയും സവായ് മധോപൂരിലെയും സ്‌കൂളുകൾ അടച്ചിട്ടിരിക്കുകയാണ്.
Discussion about this post