ന്യൂഡൽഹി: ചെങ്കോട്ടയിൽ നടക്കുന്ന ഇന്ത്യയുടെ 78മത് സ്വാതന്ത്ര്യ ദിനാഘോഷത്തിൽ വിശിഷ്ടാതിഥികളായി എത്തുന്നവരിൽ 400 വനിതകളും. വിവിധ ഗ്രാമീണ മേഖലകളിൽ നിന്നുള്ള വനിതകളെയാണ് വിശിഷ്ടാതിഥികളായി ക്ഷണിച്ചിരിക്കുന്നതെന്ന് പഞ്ചായത്ത് രാജ് മന്ത്രാലയം അറിയിച്ചു. 45 ലഖ്പതി ദീദികളും, 30 ഡ്രോൺ ദീദികളും ചടങ്ങിൽ പങ്കെടുക്കും. ഇവരെ ഗ്രാമവികസന മന്ത്രി ശിവരാജ് സിങ് ചൗഹാൻ ആദരിക്കും.
വിവിധ പദ്ധതികളുടെ ഭാഗമായി പ്രവൃത്തിച്ച് അംഗീകാരവും അവാർഡുകളും നേടിയ വനിതകൾ ഉൾപ്പെടെയുള്ളവരാണ് ചെങ്കോട്ടയിൽ നടക്കുന്ന ചടങ്ങിന് സാക്ഷ്യം വഹിക്കുക. 300 വനിതകളാകും ചടങ്ങിൽ പങ്കെടുക്കുകയെന്ന റിപ്പോർട്ടുകളും പുറത്തുവരുന്നുണ്ട്. രാജ്യത്തെ ഗ്രാമീണ മേഖലയിലെ സ്ത്രീകൾക്കിടയിൽ സാമ്പത്തിക ശാക്തീകരണവും സാമ്പത്തിക സ്വയംഭരണവും പ്രോത്സാഹിപ്പിക്കുന്നതിനുള്ള സർക്കാരിൻ്റെ പ്രധാന സംരംഭങ്ങളിൽ ഒന്നാണ് നമോ ഡ്രോൺ ദീദി, ലഖ്പതി ദീദി പദ്ധതികൾ.
ഡ്രോണുകൾ വാങ്ങുന്നതിന് വനിതാ സ്വയം സഹായ സംഘങ്ങൾക്ക് സബ്സിഡി നൽകുന്ന പദ്ധതിയാണ് നമോ ഡ്രോൺ ദീദി പദ്ധതി. സ്വയം സഹായ സംഘങ്ങൾ മുഖേനെ മൂന്ന് കോടിയിലധികം സ്ത്രീകളുടെ ഉന്നമനം ലക്ഷ്യമിട്ട് ആരംഭിച്ചതാണ് ലഖ്പതി ദീദി. ഒരു ലക്ഷമോ അതിന് മുകളിലോ വാർഷികവരുമാനമുള്ള സ്ത്രീകൾക്ക് ഈ പദ്ധതിയുടെ ഭാഗമാകാം.
രാജ്യതലസ്ഥാനത്ത് എത്തുന്ന വനിതാ പഞ്ചായത്ത് രാജ് പ്രതിനിധികൾക്ക് ആവശ്യമായ സൗകര്യങ്ങളൊരുക്കും. ഇവർക്കായി ശിൽപശാല സംഘടിപ്പിക്കും. ചടങ്ങിൽ പുതുച്ചേരി മുൻ ലഫ്റ്റനൻ്റ് ഗവർണറും നവജ്യോതി ഇന്ത്യ ഫൗണ്ടേഷൻ്റെ സ്ഥാപകയുമായ കിരൺ ബേദിയും മന്ത്രാലയത്തിലെ മുതിർന്ന ഉദ്യോഗസ്ഥരും പരിപാടിയിൽ സംസാരിക്കും. രാജ്യത്തിൻ്റെ തലസ്ഥാന നഗരത്തിലേക്കുള്ള വനിതകളായ പഞ്ചായത്ത് പ്രതിനിധികളുടെ സന്ദർശനം സമഗ്രവും സമ്പന്നവുമായ അനുഭവമായാണ് രൂപകൽപ്പന ചെയ്തിരിക്കുന്നതെന്ന് മന്ത്രാലയം അറിയിച്ചു.
78മത് സ്വാതന്ത്ര്യ ദിനാഘോഷത്തിലേക്ക് രാജ്യം കടന്നു. രാജ്യതലസ്ഥാനമായ ഡൽഹിയിലടക്കം വലിയ ഒരുക്കങ്ങളാണ് നടക്കുന്നത്. കനത്ത സുരക്ഷയിലാണ് സ്വാതന്ത്ര്യ ദിനാഘോഷ ചടങ്ങുകൾ നടക്കുന്നത്. പ്രധാന റോഡുകളും യാത്രക്കാർക്കുള്ള ബദൽ റൂട്ടുകളും അടയ്ക്കുമെന്ന് ഡൽഹി പോലീസ് അറിയിച്ചു. പുലർച്ചെ 4നും 11നും ഇടയിൽ നിരവധി റോഡുകൾ അടയ്ക്കും. പ്രധാനമന്ത്രി നരേന്ദ്ര മോദി ചെങ്കോട്ടയിൽ ദേശീയ പതാക ഉയർത്തുകയും സ്വാതന്ത്ര്യദിന പ്രസംഗം നടത്തുകയും ചെയ്യുന്നതോടെ ആഘോഷങ്ങൾ ആരംഭിക്കും. ഡൽഹിയിലെ ചെങ്കോട്ടയിലും പരിസരത്തും കനത്ത സുരക്ഷാ ക്രമീകരണങ്ങൾക്കിടയിലാണ് ആഘോഷങ്ങൾ നടക്കുക.
