‘യു ടേൺ’ അടിച്ച് വിനേഷ് ഫോഗട്ട്: കായിക പ്രേമികൾ കാത്തിരുന്ന വാർത്ത

ന്യൂഡൽഹി: പാരിസ് ഒളിംപിക്സിനിടെ ഭാര പരിശോധനയിൽ പരാജയപ്പെട്ട് വിനേഷ് ഫോഗേട്ട് പുറത്തായപ്പോൾ ഓരോ ഇന്ത്യക്കാരന്റേയും മനസ്സൊന്ന് ഇടറിയിരുന്നു. പിന്നാലെ വിരമിക്കൽ പ്രഖ്യാപിച്ചുള്ള വാർത്തയും നിരാശ സമ്മാനിക്കുന്നതായിരുന്നു. ഇപ്പോഴിതാ രാജ്യം കാത്തിരുന്ന ആ വാർത്ത എത്തിയിരിക്കുകയാണ്. വിരമിക്കൽ പ്രഖ്യാപിക്കുന്നതിൽ നിന്നും യു ടേൺ എടുത്തിരിക്കുകയാണ് താരം. 2032 വരെ വിനേഷ് തന്റെ കായിക രംഗത്ത് തുടർന്നേക്കും. സോഷ്യൽ മീഡിയയിൽ വിനേഷ് പങ്കുവെച്ച വികാരനിർഭരമായ കുറിപ്പാണ് ഇപ്പോൾ ചർച്ചയായിരിക്കുന്നത്.

പാരീസ് ഒളിമ്പിക്‌സിൽ വെള്ളി മെഡലിനായുള്ള അപ്പീൽ നിരസിച്ചതിന് രണ്ട് ദിവസത്തിന് ശേഷമാണ് വിനേഷ് ഫോഗട്ട് പോസ്റ്റ് പങ്കിട്ടത്. ഗെയിംസിൽ നിന്ന് അയോഗ്യയാക്കിയതിന് ശേഷം കായികരംഗത്ത് നിന്ന് വിരമിക്കൽ പ്രഖ്യാപിക്കില്ലായിരുന്നുവെന്നും വ്യത്യസ്ത സാഹചര്യങ്ങളിൽ 2032 വരെ തുടരാനാകുമെന്നാണ് പ്രതീക്ഷയെന്നും വിനേഷ് പറഞ്ഞു.

ഒളിമ്പിക്‌സ് ഫൈനലിലെത്തുന്ന ആദ്യ ഇന്ത്യൻ വനിതാ ഗുസ്തിക്കാരിയായി വിനേഷ് പാരീസ് ഗെയിംസിൽ ചരിത്രമെഴുതിയിരുന്നു. എന്നിരുന്നാലും, സ്വർണ്ണ-മെഡൽ പോരാട്ടത്തിന് മുന്നോടിയായുള്ള രാവിലെ ഭാരോദ്വഹനത്തിനിടെ, 100 ഗ്രാം അമിതഭാരമുള്ളതായി കണ്ടെത്തി, അതിനാൽ അയോഗ്യയാക്കപ്പെടുകയും ഒളിമ്പിക്സിൽ മെഡൽ ലഭിക്കാതിരിക്കുകയും ചെയ്തു. പിന്നാലെയാണ് താരം വിരമിക്കൽ പ്രഖ്യാപിച്ചത്.

വികാരഭരിതമായ നീളൻ പോസ്റ്റുമായാണ് വിനേഷ് എത്തിയത്. ചെറുപ്പത്തിൽ തന്റെ മാതാപിതാക്കൾ തനിക്ക് തന്ന പിന്തുണയും, ആഗ്രഹങ്ങളെ എത്തിപ്പിടിക്കാൻ പലരും കൂടെനിന്നതുമടക്കം എല്ലാം ഓർമിച്ചുകൊണ്ടുള്ള ഒരു കുറിപ്പാണ് താരം പോസ്റ്റ് ചെയ്തിരിക്കുന്നത്. കുറിപ്പിൽ ഇന്ത്യൻ ഒളിമ്പിക് അസോസിയേഷൻ നിയമിച്ച ഡോ. ദിനേശ് പടിവാലയുടെ പേര് എടുത്തുപറഞ്ഞ് താരം നന്ദി രേഖപ്പെടുത്തുന്നുണ്ട്. പരിക്ക് മൂലം ആത്മവിശ്വാസം നഷ്ടപ്പെടുമ്പോളെല്ലാം അദ്ദേഹത്തിന്റെ ഊർജവും തന്നിലുളള വിശ്വാസവുമാണ് തന്നെ വീണ്ടും ഉയർത്തെഴുന്നേൽപ്പിക്കുന്നതെന്ന് വിനേഷ് കുറിക്കുന്നു.

ഗുസ്തി താരങ്ങളുടെ പ്രതിഷേധത്തെ പരാമർശിക്കുന്ന വിനേഷ് താൻ ഇന്ത്യയിലെ സ്ത്രീകൾക്ക് വേണ്ടിയാണ് നിലകൊണ്ടതെന്നും ത്രിവർണ്ണപതാകയുടെ വിശുദ്ധി തനിക്ക് കാത്തുസൂക്ഷിക്കേണ്ടിയിരുന്നെന്നും കുറിച്ചു. രാജ്യത്തിന്റെ കൊടി പാരീസിൽ പാറിക്കളിക്കണമെന്നായിരുന്നു തന്റെ ആഗ്രഹം. എന്നാൽ തന്റെ വിധി മറ്റൊന്നായിരുന്നുവെന്ന് വിനേഷ് കുറിച്ചിരിക്കുന്നു. ഒരിക്കലും തളരില്ലെന്നും ഇനിയും ശരിയ്ക്ക് വേണ്ടി പോരാടുമെന്നും പറഞ്ഞാണ് വിനേഷ് കുറിപ്പ് അവസാനിപ്പിക്കുന്നത്.

“ഒരുപക്ഷേ വ്യത്യസ്‌ത സാഹചര്യങ്ങളിൽ, ഞാൻ 2032 വരെകളിക്കുന്നത് എനിക്ക് കാണാൻ കഴിയും, കാരണം എന്നിലെ പോരാട്ടവും എന്നിലെ ഗുസ്തിയും എല്ലായ്‌പ്പോഴും എന്റെ കൂടെ ഉണ്ടാകും. എനിക്ക് എന്റെ ഭാവി എന്തായിരിക്കുമെന്നും അടുത്ത യാത്രയിൽ എന്നെ കാത്തിരിക്കുന്നത് എന്താണെന്നും പ്രവചിക്കാൻ കഴിയില്ല, പക്ഷേ ശരിയ്ക്ക് വേണ്ടി എപ്പോഴും പോരാടുമെന്ന് എനിക്ക് ഉറപ്പുണ്ട്,” വിനേഷ് പറഞ്ഞു.