തിരുവനന്തപുരം: സിനിമയിലെ പതിനഞ്ചംസംഘം പ്രത്യേക അജണ്ടവച്ച് മാഫിയയെപ്പോലെ അച്ഛനെതിരെ പെരുമാറിയെന്ന് തിലകൻ്റെ മകൾ സോണിയ തിലകൻ. അച്ഛൻ മരിച്ചതിന് ശേഷം ഒരു പ്രധാന നടൻ എന്നെ വിളിച്ചു മോശമായി പെരുമാറി. ഈ നടൻ്റെ പേരുവിവരങ്ങൾ ഇപ്പോൾ പറയാനാകില്ല. പോൿസോ കേസ് പോലെയുള്ള ഗുരുതരമായ പ്രശ്നങ്ങൾ ഹേമ കമ്മിറ്റി റിപ്പോർട്ടിൽ പറയുന്നുണ്ട്. കർശനമായ നടപടിയാണ് ഇക്കാര്യത്തിൽ ആവശ്യമെന്ന് സോണിയ പറഞ്ഞു.
അച്ഛൻ മരിച്ച ശേഷം ഒരു പ്രധാന നടൻ എന്നെ വിളിച്ചു. അച്ഛനോട് ചെയ്ത കാര്യങ്ങളിൽ കുറ്റബോധമുണ്ടെന്ന് പറഞ്ഞാണ് വിളിച്ചത്. മോളെ എന്നൊക്കെ വിളിച്ച് ബഹുമാനത്തോടെയാണ് സംസാരിച്ചത്. എന്നാൽ ലഭിച്ച സന്ദേശങ്ങളിൽ ആ നടൻ്റെ ഉദ്ദേശ്യം വേറെയാണെന്ന് മനസ്സിലായി. അവരുടെ സുഹൃത്തിൻ്റെ മകളും സിനിമയുമായി ബന്ധമില്ലാത്ത ആളായിട്ട് പോലും എനിക്ക് ഇത്തരത്തിൽ അനുഭവമുണ്ടായെന്ന് സോണിയ ആരോപിച്ചു.
അച്ഛൻ മരിച്ചതിന് ശേഷം സിനിമയിൽ സൗഹൃദങ്ങളില്ല. വല്ലപ്പോഴും കണ്ടാൽ സംസാരിക്കും. അച്ഛനോട് ചെയ്ത കാര്യങ്ങൾ മനസ്സിൽ നിന്ന് പോകില്ലല്ലോ എന്ന് സോണിയ പറഞ്ഞു. സിനിമയിൽ നിന്നും വിലക്കിയതിന് പിന്നാലെ സീരിയലിൽ നിന്നും അച്ഛനെ വിലക്കി. സിനിമയിലെ ഒരു നടനായിരുന്നു സീരിയൽ സംഘടനയുടെ തലപ്പത്ത് ഉണ്ടായിരുന്നത്. ഹിഡൻ അജണ്ട വെച്ച് പ്രവർത്തിക്കുന്ന ഇവർ 15 പേരുണ്ട്. അച്ഛനെ പുറത്താക്കാൻ കാണിച്ച ആർജവം എന്തുകൊണ്ട് ഹേമ കമ്മിറ്റി റിപ്പോർട്ടിൽ കാണിക്കുന്നില്ലെന്ന് സോണിയ ചോദിച്ചു.
സംഘടനയിലെ പുഴുക്കുത്തുകളെക്കുറിച്ച് പുറത്തുപറഞ്ഞതിനാണ് അച്ഛൻ ക്രൂശിക്കപ്പെട്ടത്. 2010ലാണ് അച്ഛൻ ആദ്യമായി സിനിമയിലെ വിഷയങ്ങൾ പുറത്തുപറയുന്നത്. അച്ഛനുമായുള്ള പ്രശ്നം നടക്കുന്ന സമയത്ത് സംഘടനയുടെ മീറ്റിങ് നടക്കുമ്പോൾ ഏതാണ്ട് 62 ഗുണ്ടകളെ പുറത്ത് സജ്ജമാക്കിയിരുന്നു. ഇതൊരു മാഫിയ ആണെന്ന് അച്ഛൻ അന്ന് പറഞ്ഞെങ്കിലും ആരും മുഖവിലയ്ക്കെടുത്തില്ല. താരസംഘടന പിരിച്ചുവിടണം. തെറ്റുകാർക്കെതിരെ നടപടി സ്വീകരിക്കണമെന്നും സോണിയ പറഞ്ഞു.
കുട്ടിക്കാലം മുതൽ കാണുന്നതിനാൽ സിനിമക്കാരെ ഭയക്കേണ്ട കാര്യം എനിക്കില്ല. വീട്ടിലെ അംഗങ്ങളെപ്പോലെയാണ് പെരുമാറിയത്. വ്യക്തിപരമായ കാര്യങ്ങളെല്ലാം അച്ഛനുമായി അവർ സംസാരിക്കാറുണ്ടായിരുന്നു. പിന്നീട് പ്രശ്നം ഉണ്ടായപ്പോൾ എല്ലാവരും ഒറ്റക്കെട്ടായി. ഒരു മേശയ്ക്ക് ചുറ്റുമിരുന്ന് സംസാരിച്ച് തീർക്കേണ്ട കാര്യമാണ് ഈ നിലയിൽ എത്തിച്ചത്. ഹേമ കമ്മിറ്റി റിപ്പോർട്ടിൻ്റെ അടിസ്ഥാനത്തിൽ സംഘടന പരിച്ചുവിടുകയാണ് വേണ്ടത്. റിപ്പോർട്ടിലെ ബാക്കി പേജുകൾ കൂടി പുറത്തുവിടണം. കർശനമായ നിയമനടപടി സ്വീകരിക്കേണ്ട വിഷയമാണിതെന്ന് മാധ്യമ പ്രവർത്തകരുമായി സംസാരിക്കുന്നതിനിടെ സോണിയ തിലകൻ വ്യക്തമാക്കി.
