എറണാകുളം: യുവ നടന്മാരായ ടൊവിനോ തോമസ്, ആന്റണി വർഗ്ഗീസ്, ആസിഫ് അലി എന്നിവർക്കെതിരെ നടിയും നിർമ്മാതാവുമായ ഷീലു എബ്രഹാം. മൂന്ന് പേരും അഭിയനിച്ച സിനിമകൾക്ക് പരസ്പരം ആശംസ നേരുന്ന വീഡിയോ പുറത്തുവന്നതിന് പിന്നാലെയാണ് ഷീലുവിന്റെ പ്രതികരണം. സിനിമയിലെ പവർ ഗ്രൂപ്പുകളാണ് ഇവരെന്ന സൂചനയും നടി പ്രേഷകരുമായി പങ്കുവയ്ക്കുന്നു.
മൂന്ന് നടന്മാരും പരസ്പരം ആശംസകൾ നേരുന്ന വീഡിയോ ദൃശ്യങ്ങൾ കഴിഞ്ഞ ദിവസമാണ് പുറത്തുവന്നത്. മൂന്ന് സിനിമകളും ഓണം റിലീസ് ആണ്. എന്നാൽ ഓണത്തിന് ഇവരുടെ ചിത്രങ്ങൾ മാത്രമാണ് പുറത്തിറങ്ങുന്നത് എന്ന് പ്രേഷകരെ ഇവർ തെറ്റിദ്ധരിപ്പിക്കുകയാണ് വീഡിയോയിലൂടെ ചെയ്യുന്നത് എന്ന് ഷീലു പറയുന്നു. മറ്റ് സിനിമകളെ ഇവർ മനപ്പൂർവ്വം തഴിഞ്ഞു. സിനിമയിലെ പവർ ഗ്രൂപ്പുകൾ എങ്ങനെയാണ് പ്രവർത്തിക്കുന്നത് എന്ന് കാണിച്ച് തന്നതിന് നന്ദിയെന്നും ഷീലു അഭിപ്രായപ്പെടുന്നു.
പ്രിയപ്പെട്ട ടൊവിനോ ,ആസിഫ് ,പെപ്പെ …”പവർ ഗ്രൂപ്പുകൾ ”പ്രവർത്തിക്കുന്നത് എങ്ങനെ എന്ന് കാണിച്ച് തന്നതിന് നന്ദി ! നിങ്ങളുടെ ഐക്യവും സ്‌നേഹവും കാണിക്കാൻ നിങ്ങൾ ചെയ്ത ഈ വീഡിയോയിൽ ,നിങ്ങളുടെ മൂന്നു ചിത്രങ്ങൾ മാത്രമാണ് ഓണത്തിന് റിലീസ് ചെയ്യുന്നത് എന്ന തെറ്റിദ്ധാരണ ആണ് നിങ്ങൾ പ്രേക്ഷകരിലേക്ക് കൊടുക്കുന്നത് ….എന്നാൽ ഞങ്ങളുടെ ‘BAD BOYZ ഉം പിന്നെ കമ്മാട്ടിക്കളിയും , GANGS ഓഫ് സുകുമാരക്കുറുപ്പും നിങ്ങൾ നിർദ്ദാക്ഷണ്യം തഴഞ്ഞു. ഈ ചിത്രങ്ങളും ഓണത്തിന് തന്നെ ആണ് റിലീസ്…സ്വാർത്ഥമായ പവർ ഗ്രൂപ്പുകളെക്കാൾ പവർഫുൾ ആണ് മലയാളി പ്രേക്ഷകർ ..!നാളെ ഞങ്ങളുടെ ചിത്രം റിലീസ് ചെയ്യുകയാണ് .ഓണത്തിന് റിലീസ് ചെയ്യുന്ന എല്ലാ സിനിമകളും വിജയിക്കട്ടെ ,എല്ലാവര്ക്കും ലാഭവും ,മുടക്കുമുതലും തിരിച്ച് കിട്ടട്ടെ – ഷീലു ഇൻസ്റ്റഗ്രാമിൽ കുറിച്ചു.
അതേസമയം ഹേമ കമ്മിറ്റി റിപ്പോർട്ട് പുറത്തുവന്നതിന് പിന്നാലെ പവർ ഗ്രൂപ്പുമായി ബന്ധപ്പെട്ട് വലിയ ചർച്ചകൾ തുടരുകയാണ്. ഇതിനിടെയാണ് യുവ നടന്മാർക്കെതിരെ നടി രംഗത്ത് എത്തിയിരിക്കുന്നത്.
Discussion about this post