ടെൽ അവീവ്: ഇറാന്റെ ആക്രമണത്തിന് പിന്നാലെ പ്രതികരിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു. ഇറാൻ വലിയ തെറ്റ് ചെയ്തുവെന്നും ഇതിന് കനത്ത വില നൽകേണ്ടി വരുമെന്നും നെതന്യാഹു പറഞ്ഞു. ആര് ആക്രമണം നടത്തിയാലും തിരിച്ചടിയുണ്ടാകുമെന്നും നെതന്യാഹു അറിയിച്ചു. . ഇറാൻ ആക്രമണം അഴിച്ചുവിട്ടതിന് പിന്നാലെ ജെറുസലേമിൽ വിളിച്ചു ചേർത്ത മന്ത്രിസഭായോഗത്തിലാണ് ബെഞ്ചമിൻ നെതന്യാഹു ഇക്കാര്യം പറഞ്ഞത്.
ഇറാന്റെ മിസൈൽ ആക്രമണം പരാജയപ്പെട്ടുവെന്നും നെതന്യാഹു പറഞ്ഞു. വ്യോമപ്രതിരോധ സംവിധാനത്തിന്റെ മികവാണ് മിസൈൽ ആക്രമണം പരാജയപ്പെടാൻ കാരണമെന്നും നെതന്യാഹു പറഞ്ഞു. അമേരിക്കയുടെ പിന്തുണയ്ക്ക് നെതന്യാഹു നന്ദി പറഞ്ഞു. ഇറാന് നേരെ പ്രത്യാക്രമണം ഉടനുണ്ടാകുമെന്ന് ഐഡിഎഫ് വക്താവ് ഡാനിയേൽ ഹഗാരിയും പറഞ്ഞു. ഇറാൻ പ്രത്യാക്രമണം നേരിടേണ്ടി വരുമെന്ന് അമേരിക്കയും പറഞ്ഞു. ഇറാന്റെ മിസൈലുകൾ വെടിവെച്ചിടാൻ അമേരിക്കൻ പ്രസിഡന്റെ ജോ ബൈഡൻ നിർദേശിച്ചു.
ലെബനന് നേരെ ഇസ്രയേൽ നടത്തിയ ആക്രമണത്തിന് മറുപടിയായാണ് ഇറാന്റെ മിസൈൽ വർഷം. ടെൽ അവിവീലും ജെറുസലേമിലും ഇറാൻ മിസൈൽ തൊടുത്തുവിട്ടു. നാനൂറോളം മിസൈലുകൾ ഇസ്രയേലിന് മേൽ പതിച്ചതായാണ് വിവരം. ആക്രമണം സ്ഥിരീകരിച്ച് ഇസ്രയേൽ ആണ് ആദ്യം രംഗത്തെത്തിയത്. ഇതിന് പിന്നാലെ ഇറാൻ ആക്രമണത്തിന്റെ ഉത്തരവാദിത്വം ഏറ്റെടുക്കുകയായിരുന്നു. ടെൽ അവീവിൽ മിസൈൽ ആക്രമണം നടക്കുന്നതിനൊപ്പം വെടിവെയ്പും നടന്നു. വടക്കൻ ടെൽ അവീവിലെ ജാഫയിലാണ് ആക്രമണം നടന്നത്.
ഭീകരാക്രമണ സ്വഭാവമുള്ള വെടിവെയ്പാണ് നടന്നതെന്ന് ഇസ്രയേൽ അധികൃതർ പറഞ്ഞു. ആൾക്കൂട്ടത്തിന് നേരെ തോക്കുധാരികളായ രണ്ട് പേർ വെടിയുതിർത്തുകയായിരുന്നു. വെടിവെയ്പിൽ നിരവധി പേർക്ക് പരിക്കേറ്റിരുന്നു. ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്.
ഇറാന്റെ ആക്രമണത്തിന് പിന്നാലെ ഇസ്രയേൽ ജാഗ്രതാ നിർദേശം പുറപ്പെടുവിച്ചു. പൗരന്മാർ സുരക്ഷിത സ്ഥലങ്ങളിൽ തുടരണമെന്ന് നിർദേശമുണ്ട്. അതിനിടെ ഇസ്രയേലിലെ ഇന്ത്യക്കാർക്ക് ഇന്ത്യൻ എംബസിയും ജാഗ്രതാ നിർദേശം നൽകി. അനാവശ്യ യാത്രകൾ ഒഴിവാക്കണമെന്നും സുരക്ഷിത കേന്ദ്രങ്ങളിൽ തുടരണമെന്നും ഇന്ത്യൻ എംബസി ആവശ്യപ്പെട്ടു. സ്ഥിതിഗതികൾ നിരീക്ഷിച്ചുവരികയാണെന്നും ഇന്ത്യൻ എംബസി അറിയിച്ചു.
