ന്യൂഡൽഹി: ബലാത്സംഗക്കേസിൽ നടൻ സിദ്ദിഖിന് സുപ്രീം കോടതി മുൻകൂർ ജാമ്യം അനുവദിച്ചു. ജസ്റ്റിസുമാരായ ബേല ത്രിവേദി, സതീഷ് ചന്ദ്ര ശർമ എന്നിവർ ഉൾപ്പെട്ട ബെഞ്ചിൻ്റേതാണ് ഉത്തരവ്. സിദ്ദിഖിനെതിരെ പരാതി നൽകിയത് സംഭവം നടന്ന് എട്ടു വർഷത്തിന് ശേഷമെന്ന് ഉൾപ്പെടെ നിരീക്ഷിച്ചാണ് കോടതി നടപടി. സിദ്ദിഖ് തൻ്റെ പാസ്പോർട്ട് വിചാരണാ കോടതിയിൽ സമർപ്പിക്കണമെന്നും അന്വേഷണവുമായി സഹകരിക്കണമെന്നും സുപ്രീം കോടതി ജാമ്യവ്യവസ്ഥയിൽ വ്യക്തമാക്കി. കൂടുതൽ ജാമ്യവ്യവസ്ഥകൾ സംബന്ധിച്ചു വിചാരണാ കോടതിക്ക് തീരുമാനമെടക്കാമെന്നും ഉത്തരവിലുണ്ട്.
കേസിൻ്റെ സെൻസിറ്റിവിറ്റി കണക്കിലെടുത്ത് കൂടുതൽ കാര്യങ്ങൾ പറയാൻ ആഗ്രഹിക്കുന്നില്ലെന്ന് രണ്ടംഗ ബെഞ്ച് ഉത്തരവിൽ പറഞ്ഞു. 2016ൽ നടന്നതായി പറയപ്പെടുന്ന സംഭവം നടന്ന് ഏകദേശം എട്ട് വർഷത്തിന് ശേഷമാണ് പരാതിക്കാരി പരാതി നൽകിയത്. 2018ൽ പരാതിക്കാരൻ ഉൾപ്പെടെ 14 പേർക്കെതിരെ ആരോപണം ഉന്നയിച്ച് ഫേസ്ബുക്കിൽ പോസ്റ്റിട്ടു. എന്നാൽ കേരള സർക്കാർ രൂപീകരിച്ച ഹേമ കമ്മിറ്റിക്ക് മുൻപാകെ പരാതിക്കാരി മൊഴി നൽകിയിട്ടില്ലെന്ന വസ്തുതയുണ്ടെന്ന് സുപ്രീം കോടതി നിരീക്ഷിച്ചു. നേരത്തെ ഫേസ്ബുക്കിൽ പോസ്റ്റിടാൻ ധൈര്യമുണ്ടെന്നിരിക്കെ എന്തുകൊണ്ട് പോലീസിനെ സമീപിക്കാൻ മടിച്ചുവെന്ന് ജസ്റ്റിസ് ബേല ത്രിവേദി പരാതിക്കാരിയോട് ചോദിച്ചിരുന്നു.
മുതിർന്ന അഭിഭാഷകനായ മുകുൾ റോത്തഗി ആണ് സിദ്ദിഖിനായി സുപ്രീം കോടതിയിൽ ഹാജരായത്. താൻ മുതിർന്ന പൗരനാണ്, ചലച്ചിത്ര താരമാണ് എന്നിങ്ങനെയായിരുന്നു സിദ്ദിഖിൻ്റെ വാദങ്ങൾ. കൂടാതെ, 2016ൽ സംഭവം നടന്ന് എട്ടു വ‍ർഷത്തിനിപ്പുറം 2024 ഓഗസ്റ്റിലാണ് പരാതിക്കാരി പരാതി സമർപ്പിക്കുന്നതെന്നും സിദ്ദിഖ് വാദിച്ചു. പരാതിക്കാരി പരാതി സമ‍ർപ്പിക്കുന്നതിന് ഒരു ദിവസം മുൻപ് സിദ്ദിഖ് പരാതി സമ‍ർപ്പിച്ച കാര്യവും അഭിഭാഷകൻ ചൂണ്ടിക്കാട്ടി.
സിദ്ദിഖ് താരസംഘടനയായ ‘അമ്മ’യുടെ ഓഫീസ് ഭാരവാഹിയാണെന്നും പരാതിക്കാരി വിമൻ ഇൻ സിനിമ കളക്ടീവ് (ഡബ്ലുസിസി) അംഗമാണെന്നും ഇരു സംഘടനകൾ തമ്മിൽ ചില ഉരസലുകൾ ഉണ്ടെന്നും സിദ്ദിഖ് വാദിച്ചിരുന്നു. 2016ൽ നിള തീയേറ്ററിൽ സിനിമാ പ്രിവ്യു നടക്കുന്നതിനിടെ ഒരിക്കൽ മാത്രമാണ് സിദ്ദിഖ് പരാതിക്കാരിയെ കണ്ടുമുട്ടിയത്. സിദ്ദിഖ് പോലീസുമായി സഹകരിക്കുന്നുണ്ടെന്നും അഭിഭാഷകനായ മുകുൾ റോത്തഗി വാദിച്ചു. സംസ്ഥാന സർക്കാരിന് വേണ്ടി ഹാജരായ മുതിർന്ന അഭിഭാഷകൻ രഞ്ജിത്ത് കുമാർ, സിദ്ദിഖിനെ കസ്റ്റഡിയിലെടുത്ത് ചോദ്യംചെയ്യേണ്ടത് അനിവാര്യമാണെന്ന് വാദിച്ചിരുന്നു. അഡ്വ. വൃന്ദ ഗ്രോവർ ആണ് പരാതിക്കാരിക്കുവേണ്ടി ഹാജരായത്.
Discussion about this post