ന്യൂഡൽഹി: കോൺഗ്രസ്സിനെതിരെ ആഞ്ഞടിച്ച് പ്രധാനമന്ത്രി നരേന്ദ്ര മോദി. പാർലമെൻറ് സമ്മേളനത്തിന് മുന്നോടിയായി ഡൽഹിയിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം. അധികാരക്കൊതിയുള്ള പാർട്ടികളെ വോട്ടർമാർ തള്ളി. ജനങ്ങളുടെ ശബ്ദം പാർലമെൻറിലുയർത്താൻ കോൺഗ്രസിന് കഴിഞ്ഞിട്ടില്ല. ഇനിയൊട്ട് ഉയർത്തുകയുമില്ലെന്നും അദ്ദേഹം പറഞ്ഞു.
‘ജനങ്ങൾക്ക് മോശം പ്രതിപക്ഷ പാർട്ടികളെ തിരിച്ചറിയാനുള്ള കഴിവ് ഉണ്ടായിരിക്കുന്നു. പാർലമെൻറിലെ തുറന്ന സംവാദങ്ങളെ കോൺഗ്രസ് അടക്കമുള്ള പാർട്ടികൾ നിരന്തരം തടസപ്പെടുത്തുന്നു. ജനം തള്ളിയ ഇക്കൂട്ടർ സഭയെ കൂടി മലീമസപ്പെടുത്തുന്നു. അസ്വസ്ഥമാക്കാൻ ശ്രമിക്കുന്നു. യുവ എം പിമാർക്ക് ഈ ബഹളത്തിൽ ഒന്നും ചെയ്യാൻ കഴിയുന്നില്ല. അവരുടെ പ്രവർത്തനങ്ങളും തടസപ്പെടുത്തുന്നു. ഈ സമ്മേളനത്തിൽ നിരവധി വിഷയങ്ങൾ ചർച്ചക്ക് വരും.കാര്യക്ഷമമായ ഒരു സമ്മേളന കാലം പ്രതീക്ഷിക്കുന്നു.ഭരണഘടനയുടെ എഴുപത്തിയഞ്ചാം വാർഷികം രാജ്യം ആഘോഷിക്കുകയാണ്.ഭരണഘടനയുടെ പ്രാധാന്യം ഓരോ അംഗങ്ങളും ഉൾക്കൊള്ളണം.ചിലയാളുകൾ സ്വാർത്ഥ രാഷ്ട്രീയ താൽപര്യത്തിനായി സഭയെ പോലും വേദിയാക്കുന്നു’വെന്നും പ്രധാനമന്ത്രി പറഞ്ഞു.
ശൈത്യകാല സമ്മേളനത്തിന് തുടക്കമായതോടെ സഭ കൂടുതൽ പ്രക്ഷുബ്ധമാകാൻ സാധ്യതയുണ്ട്. 2029-ൽ പാർലമെൻ്റിലേക്കും എല്ലാ സംസ്ഥാന അസംബ്ലികളിലേക്കും സമന്വയിപ്പിച്ച തെരഞ്ഞെടുപ്പുകളിലേക്ക് നയിക്കാൻ ഒരു രാജ്യം ഒരു ഇലക്ഷൻ ബില്ലും കേന്ദ്ര സർക്കാർ അവതരിപ്പിച്ചേക്കും.
വഖഫ് (ഭേദഗതി) ബില്ലിന് പുറമെ പാർലമെൻ്റിൻ്റെ ഇരുസഭകളിലും അവതരിപ്പിക്കുന്നതിനും പാസാക്കുന്നതിനുമായി അഞ്ച് ബില്ലുകൾ പട്ടികപ്പെടുത്തിയിട്ടുണ്ട്. മർച്ചൻ്റ് ഷിപ്പിംഗ് ബിൽ, തീരദേശ ഷിപ്പിംഗ് ബിൽ, ഇന്ത്യൻ തുറമുഖ ബിൽ, പഞ്ചാബ് കോടതികൾ (ഭേദഗതി) ബിൽ, രാഷ്ട്രീയ സഹകാരി വിശ്വവിദ്യാലയ ബിൽ എന്നിവയാണ് പുതിയ അഞ്ച് ബില്ലുകൾ.
Discussion about this post