മലയാളത്തിലെ പ്രമുഖ നടിക്കെതിരെ വി ശിവൻകുട്ടി; വന്ന വഴി നടി മറക്കരുതെന്ന് മുന്നറിയിപ്പ്

തിരുവനന്തപുരം: കുട്ടികളെ അവതരണഗാനം പഠിപ്പിക്കാൻ പ്രതിഫലം ആവശ്യപ്പെട്ട നടിയ്‌ക്കെതിരെ വിദ്യാഭ്യാസ മന്ത്രി വി.ശിവൻകുട്ടി. വിദ്യാഭ്യാസ മന്ത്രി എന്ന നിലയിൽ സംഭവം തന്നെ ഒരുപാട് വേദനിപ്പിച്ചതായി അദ്ദേഹം പറഞ്ഞു. കേരളത്തിലെ 47 ലക്ഷം വിദ്യാർത്ഥികളോട് നടി അഹങ്കാരം കാണിക്കുകയാണെന്നും മന്ത്രി കുറ്റപ്പെടുത്തി. കുട്ടികളെ അവതരണഗാനം പഠിപ്പിക്കാൻ അഞ്ച് ലക്ഷം രൂപ ആയിരുന്നു നടി പ്രതിഫലമായി ആവശ്യപ്പെട്ടത്.

നടിയുടെ പേര് പറയാതെ ആയിരുന്നു ശിവൻകുട്ടിയുടെ വിമർശനം. സ്‌കൂൾ കലോത്സവങ്ങളിൽ പങ്കെടുത്ത് വിജയിച്ച ശേഷമാണ് നടി സിനിമയിൽ എത്തിയതെന്ന് ശിവൻകുട്ടി പറഞ്ഞു. ഈ സാഹചര്യത്തിൽ നടി കുട്ടികൾക്ക് മാതൃകയാകുകയാണ് വേണ്ടത്. എന്നാൽ കുറച്ച് സിനിമകളിൽ അഭിനയിച്ച് കാശും ആയപ്പോൾ കേരളത്തോട് അഹങ്കാരം കാണിക്കുകയാണ്.

16,000 കുട്ടികളെ പങ്കെടുപ്പിച്ച് ജനുവരിയിൽ നടക്കാനിരിക്കുന്ന കലോത്സവത്തിൽ അവതരണം ഗാനം പഠിപ്പിക്കുന്നതിന് വേണ്ടിയാണ് നടിയെ സമീപിച്ചത്. കുട്ടികളെ പഠിപ്പിക്കാമെന്ന് നടി സമ്മതിയ്ക്കുകയും ചെയ്തു. എന്നാൽ 10 മിനിറ്റ് നേരത്തേയ്ക്കുള്ള ഗാനം പഠിപ്പിക്കുന്നതിന് അഞ്ച് ലക്ഷം രൂപ ഇവർ പ്രതിഫലമായി ചോദിക്കുകയായിരുന്നു.

വിദ്യാഭ്യാസ മന്ത്രി എന്ന നിലയിൽ ഈ സംഭവം ഏറെ വേദനിപ്പിച്ചു. ഇത്രയും വലിയ തുക നൽകി കുട്ടികളെ പഠിപ്പിക്കാൻ ഉദ്ദേശിക്കുന്നില്ല. നമ്മുടെ ചുറ്റും നിരവധി നൃത്ത അദ്ധ്യാപകർ ഉണ്ട്. സാമ്പത്തിക മോഹികളല്ലാത്ത നൃത്ത അദ്ധ്യാപകരെ ഉപയോഗിച്ച് സ്വാഗതഗാനം പഠിപ്പിക്കാൻ തീരുമാനിച്ചുവെന്നും അദ്ദേഹം കൂട്ടിച്ചേർത്തു.