ഷിർദ്ദി: ഓടുന്ന ബസിൽ വച്ച് തന്നെ കയറി പിടിക്കാൻ ശ്രമിച്ചയാളെ തല്ലുന്ന ഒരു സ്ത്രീയുടെ വീഡിയോ സോഷ്യൽ മീഡിയകളിൽ വൈറലാവുകയാണ്. മദ്യപിച്ചെത്തി തന്നെ കയറിപ്പിടിക്കാൻ ശ്രമിച്ച യുവാവിനെ യുവതി, മറ്റ് യാത്രക്കാരുടെ മുന്നിൽ വച്ച് നിരവധി തവണ മുഖത്തടിക്കുന്നതായിരുന്നു വീഡിയോയിൽ ഉണ്ടായിരുന്നത്.
മഹാരാഷാട്രയിലെ ഷിർദ്ദിയിലാണ് സംഭവം നടന്നിരിക്കുന്നത്..
‘മദ്യപിച്ചെത്തിയ യുവാവ് ബസിൽ വച്ച് സ്ത്രീ യാത്രക്കാരിയെ ഉപദ്രവിക്കാൻ ശ്രമിച്ചു. ‘രണരാഗിണി’ അവരുടെ മികച്ച പോരാട്ടം കാഴ്ചവച്ചു.’ എന്ന് കുറിച്ച് കൊണ്ട് ലോക്മാറ്റ് എന്ന എക്സ് ഹാൻറിലിൽ നിന്നുമാണ് വീഡിയോ പങ്കുവയ്ക്കപ്പെട്ടത്. പിന്നാലെ വീഡിയോ വൈറലാവുകയും നിരവധി എക്സ് ഹാൻറിലുകളിൽ വീഡോയ പങ്കുവയ്ക്കപ്പെടുകയും ചെയ്തു. പൂനെ നഗരത്തിലെ ഒരു ബസിൽ യാത്ര ചെയ്യവേ, മദ്യപിച്ച് ബസിൽ കയറിയ യുവാവ്, യുവതിയുടെ കൈയിൽ കയറിപ്പിടിക്കുകയായിരുന്നു. ഇതിൽ പ്രകോപിതയായ യുവതി ഏതാണ്ട് ഇരുപതോളം തവണയാണ് യുവാവിൻറെ ഇരുകവിളിലുമായി അടിച്ചത്.
ഇവർ ഷിർദ്ദിയിലെ ഒരു സ്കൂളിൽ കായിക അധ്യാപികയായി ജോലി ചെയ്യുന്ന പ്രിയ ലഷ്കരാണെന്ന് റിപ്പോർട്ടുകൾ പറയുന്നു. ഇത്രയേറെ നേരം പ്രിയ യുവാവിൻറെ മുഖത്ത് അടിച്ചിട്ടും യാത്രക്കാരാരും പ്രതികരിക്കാൻ തയ്യാറായില്ല. ഒടുവിൽ, ബസിലെ കണ്ടക്ടർ പ്രശ്നത്തിൽ ഇടപെട്ടപ്പോൾ ബസ്, പോലീസ് സ്റ്റേഷനിലേക്ക് എടുക്കാൻ പ്രിയ ആവശ്യപ്പെട്ടുന്നതും വീഡിയോയിൽ കേൾക്കാം. ഇയാളെ പിന്നീട് ശനിവാർഡ പോലീസ് സ്റ്റേഷനിൽ എത്തിച്ചെന്നും റിപ്പോർട്ടുകൾ പറയുന്നു. യുവാവിനെ പൊതിരെ തല്ലുന്ന യുവതിയുടെ വീഡിയോ സമൂഹ മാധ്യമങ്ങളിൽ വലിയ ചർച്ചകൾക്ക് തന്നെ തുടക്കം കുറിച്ചു. ഇങ്ങനെ തല്ലേണ്ടതുണ്ടോയെന്നായിരുന്നു ചിലരുടെ കുറിപ്പ്. എന്നാൽ യുവതിയെ അഭിനന്ദിച്ചും ഇങ്ങനെ പ്രതികരിച്ചാലെ കാര്യങ്ങളിൽ അല്പമെങ്കിലും മാറ്റമുണ്ടാകൂവെന്നും നിരവധി പേരാണ് എഴുതിയത്. മറ്റ് ചിലർ അവരെ ചെരിപ്പൂരി അടിക്കൂവെന്നായിരുന്നു പ്രതികരിച്ചത്.
Discussion about this post