ഭോപ്പാല്: മധ്യപ്രദേശില് മണല് മാഫിയ പൊലീസുകാരനെ ട്രാക്ടര് കയറ്റിക്കൊന്നു. ശാഹ്ഡോലിലെ എഎസ്ഐ മഹേന്ദ്ര ബാഗ്രിയാണ് കൊല്ലപ്പെട്ടത്. മണലുമായി പോവുകയായിരുന്ന ട്രാക്ടര് ബാഗ്രി തടയാന് ശ്രമിച്ചതിന് പിന്നാലെയാണ് സംഭവം.
ശനിയാഴ്ച രാത്രിയായിരുന്നു സംഭവം. പ്രദേശത്ത് മണല്ക്കടത്ത് നടക്കുന്നുണ്ടെന്ന വിവരത്തെ തുടര്ന്ന് പ്രസാദ് കനോജി, സഞ്ജയ് ദൂബേ എന്നീ കോണ്സ്റ്റബിള്മാര്ക്കൊപ്പം പരിശോധനയ്ക്ക് പോയതായിരുന്നു ബാഗ്രി. മണലുമായി പോവുകയായിരുന്ന ട്രാക്ടര് ബാഗ്രി തടയാന് ശ്രമിച്ചു. തുടര്ന്ന് ട്രാക്ടര് അദ്ദേഹത്തിന്റെ ദേഹത്തുകൂടി കയറ്റിയിറക്കുകയായിരുന്നു.
ബാഗ്രി സംഭവ സ്ഥലത്തു തന്നെ മരിച്ചു. പ്രസാദും സഞ്ജയും പരിക്കേല്ക്കാതെ രക്ഷപ്പെട്ടു. ട്രാക്ടറിന്റെ ഡ്രൈവറും ഉടമയുടെ മകനെയും അറസ്റ്റ് ചെയ്തു. വാഹനത്തിന്റെ ഉടമയെ ഇനിയും പിടികൂടാന് കഴിഞ്ഞിട്ടില്ല. ഇയാളെ കുറിച്ച് വിവരം നല്കുന്നവര്ക്ക് പൊലീസ് മുപ്പതിനായിരം രൂപ പാരിതോഷികം പ്രഖ്യാപിച്ചിട്ടുണ്ട്.
