കോൺഗ്രസ് നേതാവ് രാഹുൽ ഗാന്ധി ഒരുപാട് ആഗ്രഹങ്ങളുള്ള അമ്മയുടെ ഇരയാണെന്ന് ബോളിവുഡ് നടിയും ബിജെപി സ്ഥാനാർത്ഥിയുമായ കങ്കണ റണാവത്ത്. രാഹുൽ ഗാന്ധിയും സഹോദരി പ്രിയങ്കയും രാഷ്ട്രീയത്തിലേക്ക് വരാൻ സോണിയ ഗാന്ധി നിർബന്ധിച്ചെന്നും കങ്കണ റണാവത്ത് പറഞ്ഞു.
“രാഹുൽ ഗാന്ധി ഒരുപാട് ആഗ്രഹങ്ങളുള്ള അമ്മയുടെ ഇരയാണ്. ‘3 ഇഡിയറ്റ്സ്’ എന്ന സിനിമയിൽ നമ്മൾ കണ്ടതുപോലെ. കുട്ടികൾ കുടുംബവാദത്തിൻ്റെ ഇരകളാകുന്നു. അതുപോലെയാണ് രാഹുൽ ഗാന്ധിയുടെ അവസ്ഥ,” നടി പറഞ്ഞു.
രാഹുലിനെയും പ്രിയങ്കാ ഗാന്ധിയെയും രാഷ്ട്രീയത്തിൽ തുടരാൻ അമ്മ പീഡിപ്പിക്കുകയാണെന്നും അവരെ സ്വന്തം ജീവിതം നയിക്കാൻ അനുവദിക്കണമായിരുന്നുവെന്നും കങ്കണാ റണാവത്ത് പറഞ്ഞു.
50 വയസ്സിന് മുകളിലാണെങ്കിലും രാഹുൽ ഗാന്ധി എല്ലായ്പ്പോഴും ഒരു യുവനേതാവായി വീണ്ടും വീണ്ടും അവതരിപ്പിക്കുന്നതായി തോന്നുന്നതായും അവർ പറഞ്ഞു.
“അദ്ദേഹം സമ്മർദ്ദത്തിലാണെന്നും വളരെ ഏകാന്തതയിലാണെന്നും എനിക്ക് തോന്നുന്നു,” കങ്കണ പറഞ്ഞു.
കോൺഗ്രസ് മറ്റേതെങ്കിലും തൊഴിൽ ചെയ്യാൻ അദ്ദേഹത്തെ അനുവദിക്കണമായിരുന്നുവെന്നും അഭിനയത്തിൽ ഒരു കൈ നോക്കാമായിരുന്നുവെന്നും നടി പറഞ്ഞു.
“രാഹുൽ ഗാന്ധി മറ്റെന്തെങ്കിലും ചെയ്യണമായിരുന്നു, ഒരുപക്ഷേ അഭിനയത്തിൽ ഒരു കൈ നോക്കണം. അദ്ദേഹത്തിന് ഒരു നല്ല നടനാകാമായിരുന്നു. അദ്ദേഹത്തിൻ്റെ അമ്മ ലോകത്തിലെ ഏറ്റവും ധനികയായ സ്ത്രീകളിൽ ഒരാളാണ്. സമ്പത്തിന് ഒരു കുറവുമില്ല, അദ്ദേഹം ഒരു സ്ത്രീയുമായി പ്രണയത്തിലാണെന്ന് കിംവദന്തികൾ ഉണ്ടായിരുന്നു. അദ്ദേഹം വിവാഹം കഴിക്കുന്നില്ല, ” കങ്കണാ റണാവത്ത് പറഞ്ഞു.
